चलचित्र ‘छक्का पञ्जा ३’ ले ५१ दिन मनाएको सफलता हाम्रो मात्र होइन् । यो तपाईं हामी सबै चलचित्रकर्मीसँगै नेपालीको सफलता हो । यो सफलता म सम्पूर्ण नेपाली चलचित्र उद्योगलाई समर्पित गर्न चाहन्छु ।

अहिले नेपाली चलचित्रले यति ठूलो बजारसँग प्रतिस्पर्धा गरिरहनुपरेको छ । विश्वमै दोस्रो स्थान ओगटेको बलिउडसँग प्रतिस्पर्धा गरिरहेका छौं । जहाँ अर्बौको लगानीमा चलचित्रहरू बन्ने गर्छ, भीएफएक्समा बलिउड धेरै माथि पुगिसकेको छ ।

त्यहाँको प्रविधि पनि कति माथि पुगिसक्यो । नेपाली चलचित्रहरू त्यस्तो महङ्गो बजेटका चलचित्रहरूसँग प्रतिस्पर्धा गरिरहेका छन् । अर्बाैका हलिउड, बलिउड चलचित्र र हाम्रा एक करोड, दुई करोडमा बनेका चलचित्रहरू एउटै पर्दामा लाग्छ, एकै दिन लाग्छ र एउटै मूल्यमा हेर्न पाइन्छ ।

यस्तो खालको प्रतिस्पर्धामा समेत कुनै पनि भारतीय चलचित्रले नेपालमा गरेको व्यापार भन्दा उत्कृष्ट व्यापार ‘छक्का पञ्जा ३’ ले गरेको छ । आज हाम्रो सफल भयो, भोलि अर्कोको चलचित्र सफल हुन्छ ।

हामीसँग चलचित्र प्रदर्शनका लागि वर्षमा ५२ वटा हप्ता छ । ती ५२ वटै हप्तामा एकदिन हामीले प्रमाणित गर्नु छ कि नेपालमा नेपाली चलचित्र नम्बर एकमा छ । हिन्दी/अंग्रेजी २, ३ तिर पर्छ भनेर ।

हो, हामीले बलिउड, हलिउडको प्रविधिसँग प्रतिस्पर्धा गर्न सक्दैन् । किनकी हामीसँग न्यून बजेट छ । तर कथामा, प्रस्तुतिमा, मौलिकतामा हामी प्रतिस्पर्धा गर्न सक्छौं र उनीहरू भन्दा अब्बल साबित हुन सक्छौं । जुन कुरा हामीले पछिल्ला दिनहरूमा प्रमाणित पनि गर्दै आएका छौं । 

नेपाली चलचित्र क्षेत्रलाई अगाडि बढाउन हामी चलचित्रकर्मी कार्यगत एकतामा अगाडि बढनुपर्छ । त्यो भयो भने भोलिका दिनमा नेपालमा सधै नेपाली चलचित्र नै अगाडि हुनेछन् । गीतसंगित तिर हेर्नुस्, म कलेजमा पढ्दा ‘तुम मिले’ गीत गाएर हिँडथें अथवा रेडियो ट्याक्सीमा पनि त्यही गीत बज्थ्यो । पार्टी प्यालेसमा त्यो खालका गीतहरू बज्थ्यो ।

अहिले ‘सुर्के थैली खै’पछि हेर्नुस् अवस्था परिवर्तन भएको छ । अहिले पार्टी प्यालेसमा हेर्नुस् चाहे स्कूलमा जहाँपनि ८० प्रतिशत हाम्रा नेपाली गीतहरू बज्छन् ।

एकताका शम्भुजित बास्कोटा दाइले शुरू गर्नुभएको ‘रातो टीका निधार’मा गीतको व्याप्तता थियो । त्यतिबेला बीचमा पुन: लोक गीत हराएको थियो, अहिले लोकगीत आएको छ ।

यो पक्कैपनि नेपाली चलचित्र क्षेत्रकै लागि सुखद कुरा हो । नेपाली चलचित्रलाई हामी एक्लै अगाडि लैजान्छौं भनेर सम्भव छैन । हामी चलचित्रकर्मीहरू मिलेर, कार्यगत एकताका रुपमा अगाडि बढ्ने हो भने नेपाली चलचित्रको सुनौलो दिन हेर्न धेरै वर्ष लाग्ने छैन । नेपाली चलचित्र अवश्य पनि अगाडि बढ्नेछ । 

(चलचित्र ‘छक्का पन्जा ३’ले ५१ दिन मनाएको खुसीयाली आदानप्रदान कार्यक्रममा चलचित्रका लेखक तथा कलाकार दीपकराज गिरीले दिएको मन्तव्य ।)