काठमाडौं – केरुङ–काठमाडौं रेलमार्ग निर्माणका सम्बन्धमा चिनियाँ र नेपाली टोलीबीच छलफल चलिरहेको छ ।

केरुङबाट काठमाडौंसम्म रेलमार्ग निर्माणका सम्बन्धमा छलफल गर्न नेपाल आएको चिनियाँ टोली र नेपाली टोलीबीच भौतिक पूर्वाधार तथा यातायात मन्त्रालयमा छलफल भइरहेको हो ।

रेलमार्ग निर्माणका लागि चिनियाँ पक्षले गरेको प्रारम्भिक अध्ययनका बारेमा छलफल भइरहेको जनाइएको छ । नेपाली पक्षको नेतृत्व भौतिक पूर्वाधार तथा यातायात मन्त्रालयका सचिव मधुसुदन अधिकारीले गरेका छन् ।

छलफलका लागि आइतवार नेपाल आइपुगेको चिनियाँ टोलीमा चीनको राष्ट्रिय रेल प्रशासनका एक दर्जनभन्दा बढी सदस्य रहेको भौतिक पूर्वाधार तथा यातायात मन्त्रालयले जानकारी दिएको छ ।

छलफलमा नेपालको रेल विभागका अधिकारीहरूको समेत सहभागिता रहेको छ । प्रारम्भिक अध्ययन यसअघि नै भइसकेको केरुङ– काठमाडौं रेलमार्गको लम्बाई ७२ दशमलव ५ किलोमिट हुने र साढे २ खर्ब रुपैयाँ लागत लाग्ने देखिएको छ ।

रेलमार्ग निर्माण सम्पन्न गर्नका लागि ९ वर्ष समय लाग्ने प्रारम्भिक अध्ययनले देखाएको छ । छलफलपछि चिनियाँ टोली अवलोकनका लागि पोखरा जाने मन्त्रालयले जानकारी दिएको छ ।

छलफलले डीपीआर (विस्तृत परियोजना प्रतिवेदन)को लागत कसले व्योहोर्ने भन्ने विषय टुङ्गो लगाउने बताइएको छ ।