काठमाडौं — फ्रान्सका राष्ट्रपति इम्मानुएल म्याक्रोंले पहेंलो ज्याकेट आन्दोलनकारीहरूलाई दिएको छुटले विरोधकर्ता र विपक्षी दलका राजनीतिकर्मीहरूलाई सन्तुष्ट बनाउन सकेको छैन । 

विपक्षी नेता जाँ–लुक मेलेनचोनले सम्पत्तिको समान वितरणको लक्ष्य हासिल नहुन्जेल नागरिकको क्रान्ति गर्नुपर्ने बताएका छन् । 

म्याक्रोंले आन्दोलन मत्थर पार्नका लागि सामाजिक तथा आर्थिक संकटकाल घोषणा गर्दै आन्दोलनकारीको पीरमर्का सम्बोधन गर्नका लागि थुप्रै छुटको घोषणा गरेका थिए । तर वामपन्थी नेता मेलेनचोनले आन्दोलनकारीहरूलाई अर्को
शनिवार पनि आन्दोलन जारी राख्न आह्वान गरे । 

म्याक्रोंले कम्तीमा १०० युरो तलब वृद्धि, कररहित ओभरटाइम पे र वर्षको अन्त्यमा बोनसको व्यवस्थाको प्रतिज्ञा गरे । तर यसले फ्रान्सेली जनसंख्याको ठूलो भागलाई कुनै असर नपर्ने मेलेनचोनको भनाइ छ । 

‘हामीहरू सम्पत्तिको वास्तविक पुनर्वितरणको अपेक्षा गर्छौं,’ राष्ट्रपति पदका पूर्व उम्मेदवार बेनोइत हामोनले बताए । उनले म्याक्रोंको प्याकेजबाट धनीलाई फाइदा हुने बताए । 

सोसियलिस्ट पार्टीका प्रथम सचिव ओलिभियर फाउरेले पनि संघर्षरत कामदारका लागि म्याक्रोंको आर्थिक छुटको आलोचना गर्दै उनको नीतिमा परिवर्तन नआएको बताए । 

करका केही प्रावधानको स्वागत गरेपनि विपक्षी नेत्री मरिन ले पेंले राष्ट्रपतिको शासन मोडल अनियन्त्रित विश्वव्यापीकरण, अर्थतन्त्रको वित्तीकरण र अस्वच्छ प्रतिस्पर्धामा आधारित रहेको अनि यसले पहेंलो ज्याकेट आन्दोलनको
सामाजिक तथा सांस्कृतिक परिणामलाई सम्बोधन गर्न नसकेको बताइन् । 

एजेन्सी