जनकपुरधाम – राष्ट्रिय जनता पार्टी (राजपा) नेपालभित्र कुनै पनि किसिमको विवाद नरहेको अध्यक्ष मण्डलका सदस्य महन्थ ठाकुरले बताएका छन् ।

भारतको दिल्लीमा उपचार गराएर सीताराम विवाहपञ्चमी महामहोत्सवमा सहभागी हुन जनकपुर आएका ठाकुरले लोकान्तरसँग संक्षिप्त कुराकानी गर्दै भने, ‘राजपा पार्टी फुट्ने भन्ने मिडियामा आएको कुरा सत्य होइन । पार्टीभित्र कुनै पनि किसिमको विवाद छैन ।’

अध्यक्ष मण्डलको संयोजक परिवर्तन भएपछि ठाकुर असन्तुष्ट भएको र पूर्व तमलोपा पक्षले छुट्टै भेला डाकिरहेको सवालमा ठाकुरले भने, ‘म प्रभावित मान्छे हो । के मेरो मुखबाट तपाईंहरूले केही असन्तुष्टिको श्वर अहिलेसम्म सुन्नुभएको छ त ? के पूर्व तमलोपाको छुट्टै भेला बसेको छ त ?’

राजपाभित्र नेतृत्वको ‘उठापटक’ भयो भनेर भइरहेको हल्ला झूटा भएको बताउँदै ठाकुरले भने, ‘२–२ महिनामा संयोजक परिवर्तन गर्ने कुरा विधानमै व्यवस्था गरिएको थियो । तर अध्यक्ष मण्डलका साथीहरूले नै महाधिवेशनसम्म तपाईं नै संयोजक रहिरहनुहोस् भन्ने कुरा भनेपछि म संयोजक बसेको हो ।’

संयोजक फेर्नु सामान्य भएपनि विधानमै व्यवस्था भएअनुसार सर्वसम्मतिले हुनुपर्ने बताउँदै उनले भने, ‘मैले त नेतृत्व परिवर्तन गर्न पालो पहिले पनि साथीहरूलाई दिएकै हो । तर उहाँहरूले नै महाधिवेशनसम्म तपाईं नै संयोजक रहनुस् भनेर यति लामो समय बसेको हो ।’

बहुमतको आधारमा अध्यक्ष मण्डलको संयोजकमा राजेन्द्र महतो चयन हुनु अवैधानिक हो त भन्ने सवालमा उनले भने, ‘वैधानिक वा अवैधानिक भनेर अदालतमा लाग्ने विषय होइन । यो हाम्रो आन्तरिक विषय भएकाले हामी आफैं बसेर त्यस विषयमा छलफल गर्नेछौं ।’

संघीय सरकारलाई दिएको समर्थन फिर्ता लिने सन्दर्भमा उनले भने, ‘हाम्रो पुरानो माग र अडानहरू यथावतै छन् । त्यसमा कुनै पनि कुराको सुनुवाइ भएको छैन । पार्टीमा छलफल गरेर त्यसबारे निर्णय लिइने छ ।’