सुर्खेत – केही महिना पहिले वीरेन्द्रनगर नगरपालिकाले नगर क्षेत्रमा भएको सार्वजनिक जग्गा अतिक्रमणलाई पूर्णरुपमा हटाएको थियो ।

कर्णाली प्रदेश राजधानी रहेको नगर क्षेत्रका विभिन्न बजार मंगलगढी चोक, घण्टाघर क्षेत्रलगायत स्थानमा वर्षौदेखि व्यवसायीले कब्जा गरेर राखेको स्थानमा नगरले डोजर चलाएको थियो । जसका कारण नगर क्षेत्रमा भएको अतिक्रमण शून्य भएको थियो ।

तर अहिले भने नगर सुस्ताएको छ । नगरपालिका जाने घण्टाघर सडकमा मध्यपश्चिम विश्वविद्यालयको जग्गामा व्यवसायीले व्यापार गर्न शुरू गरेका छन् । त्यसरी व्यापार गर्न शुरू गरेको २ महिना भइसकेको छ ।

नगर क्षेत्रमा अतिक्रमण फेरि शुरू हुन थालेपछि नगरपालिका सुस्ताउँदा त्यसले भविष्यमा विगतजस्तै अवस्था आउने देखिएको छ । कुनै बेला अतिक्रमण हटाउने त कुनै बेला सुस्ताउने कार्यले नगरलाई नै समस्यामा पार्नेछ ।

वीरेन्द्रनगर नगरपालिकाका उपप्रमुख मोहनमाया ढकालले बजार क्षेत्रमा अतिक्रमण गर्न नदिने बताइन् । ‘हामी सुस्ताएका होइनौं,’ उनले भनिन्, ‘हामीले ऐन, नियम र कार्यविधि बनाइरहेका थियौं । अहिले बनाइसकेका छौं,’ उपप्रमुख ढकालले भनिन् । उनले अब पुस १ गतेबाट नयाँ बजार व्यवस्थापन ऐन लागू हुने र अतिक्रमण भएको बजार क्षेत्रलाई खाली गराउन सहयोग पुग्ने बताइन् ।

‘यसअघि ऐन नबनाउँदा कसलाई, कुन आधारमा कारवाही गर्ने भन्ने अन्योल थियो,’ उनले भनिन्, ‘तर अब ऐन बनाइसकेका छौं । त्यही ऐनमा टेकेर कडाइका साथ ऐन लागू गर्दै अघि बढ्छौं । यसमा शंका लिन जरुरी नै छैन ।’