'उरी' फिल्म समीक्षा : देशभक्तिको सन्देश, रोमाञ्चक एक्सन

पुस २७, २०७५

काठमाडौं — सन् २०१६ मा भारतीय सेनाले पाकिस्तानको आतंकवादी ठेगानामा गरेको सर्जिकल स्ट्राइकमा आधारित फिल्म उरी शुक्रवार सार्वजनिक भएको छ । कश्मीरमा रहेको उरी बेस क्याम्पमा भारतीय सैनिकहरूमाथि गरिएको आतंकवादी आक्रमणको बदला लिनका लागि यो सर्जिकल स्ट्राइक गरिएको थियो । 

उक्त अपरेसन टीमको नेतृत्व विहान सिंह शेरगिल (विक्की कौशल) ले गरेका छन् र उनी देशभक्ति र व्यक्तिगत कारणबाट प्रेरित छन् । 

निर्देशक आदित्य धरले शुरूआतमा विहानको चरित्रलाई स्थापित गरेका छन् । विहान एक बहादुर र आफ्नो इकाइका प्रिय सैनिक हुन् । विहान सैन्य कारवाहीबाट टाढिने निर्णय गर्छन् किनकि उनी अल्जाइमरबाट पीडित आफ्नी आमासँग केही समय बिताउन चाहन्छन् । 

उनका साथी तथा बहिनी ज्वाईं क्याप्टेन करण कश्यप (मोहित रैना) चाहिँ सबै चुनौतीको सामना गर्नका लागि अघि बढ्छन् । अनि विहान चाहिँ निजी जीवनमा हुने घटनाको दुःखद मोडको सामना गर्नुपरेपछि सर्जिकल स्ट्राइकमा भाग लिएर सीमामा डटिन्छन् । 

यस मिसनका लागि विशेष रूपले छानिनुका अलावा उनले सहायताका लागि दुई महिला पल्लवी शर्मा (यामी गौतम) र जसकीरत (कीर्ति कुल्हारी) को साथ पनि पाउँछन् । अपरेसनका मास्टरमाइन्ड हुन् प्रधानमन्त्रीका राष्ट्रिय सुरक्षा
सल्लाहकार गोविन्द (परेश रावल) । परेश रावलले अजित डोभाल जस्तो देखिनका लागि मेहनत गरेका छन् र राम्रो अभिनय गरेका छन् । दिग्गज अभिनेता रजित कपूर प्रधानमन्त्री नरेन्द्र मोदीको भूमिकामा छन् । 

निर्देशक धरले युद्धका दृश्यहरूलाई यथासम्भव यथार्थवादी बनाएका छन् । एक्सन दृश्यहरू टाइट राखिएका छन् र तिनले दर्शकलाई बाँधेर राख्छन् । केही दृश्य एकदमै गजबका छन् र दर्शकहरू पर्दाबाट आँखा हटाउनै सक्दैनन् । 

फिल्मको पहिलो हाफ शानदार छ तर दोस्रो हाफले निराश पार्छ किनकि त्यो प्रेडिक्टेबल लाग्छ र कसिएको कथानकबाट भट्किन्छ । 

फिल्मले युद्धको खतराप्रति जागरुक गराउँछ र यही नै यसको प्लस पोइन्ट हो । 

मेजरको भूमिकामा विक्की कौशल शानदार छन् । उनले स्पष्ट रूपमा भूमिकामा फिट हुनका लागि आफूलाई निखारेका छन् र उनी यो रोलका लागि सही अभिनेता ठहरिन्छन् । कमजोर स्थितिमा हुँदाहुँदै पनि उनको दृढताले
उनको चरित्रको आन्तरिक शक्तिलाई दर्शाउँछ । 

मोहित रैनाले पनि आफ्नो भूमिकालाई न्याय गरेका छन् । यामी र कीर्तिलाई फिल्ममा खासै भूमिका दिइएको छैन तर आआफ्नो पात्रमा उनीहरू फिट छन् । 

फिल्म हेर्ने नै सल्लाह दिइन्छ किनकि ड्रोनसहित आधुनिक युद्ध हतियारसँग परिचित भएपछि पनि एक्सन दृश्यले मोहित गर्छन् । सर्जिकल स्ट्राइक गरिएको रात सीमामा वास्तवमा के भएको थियो भन्ने फिल्मले देखाउँछ ।
सैनिकहरूले दिनदिनै भोग्नुपर्ने वास्तविक खतराको मसिनो वर्णन फिल्मले गरेको छ । 

फिल्म : उरी
कलाकार : विक्की कौशल, परेश रावल, मोहित रैना, यामी गौतम, कीर्ति कुल्हारी
निर्देशक : आदित्य धर
विधा : एक्सन
अवधि : २ घन्टा ७ मिनेट
रेटिङ : ३.५/५

 


ADVERTISEMENT

दैनिक भास्करमा प्रकाशित समीक्षाको भावानुवाद

पुस २७, २०७५ मा प्रकाशित

प्रतिक्रिया दिनुहोस

ताजा समाचार