काठमाडौं– सरकारले घरेलु प्रयोजनका लागि रातो रङको ग्यास सिलिण्ड र उद्योगी तथा व्यवसायीका लागि नीलो रङको सिलिण्डर प्रयोगमा ल्याउने भएको छ ।

उद्योग, वाणिज्य तथा आपुर्ति मन्त्रालयले विशेष सहुलियत दिइने घर परिवारलाई रातो रङको सिलिण्डर र व्यवसायी तथा उद्योगीलाई नीलो रङको सिलण्डिर प्रयोगमा ल्याउने व्यवस्था कडाईका साथ कार्यान्वयनमा ल्याउन नेपाल आयल निगमलाई निर्देशन दिएको हो ।

यसअघि देखि नै आयल निगमले रातो र नीलो रङको सिलिण्डर प्रयोजनको आधारमा हुनु पर्ने भन्दै ग्यास उद्योगीलाई निर्देशन दिएको थियो ।

तर, निगमको निर्देशन अनुसार घरेलु प्रयोजनको लागि रातो र अन्य प्रयोजनको लागि नीलो सिलिण्डर प्रयोगमा आउन सकेनन् ।

पछिल्लो समय बजारमा जुनसुकै प्रयोजनका लागि जुनसुकै सिलिण्डर प्रयोगमा रहेकाछन् ।

रातो र नीलो सिलिण्डर प्रयोगमा आएपछि ग्यासको मुल्य समेत फरक – फरक हुने निगमले जानकारी दिएको छ ।

निगमका प्रवक्ता विरेन्द्र गोइतले आयस्तर न्यून भएका घर परिवारलाई सहुलियत उपलब्ध गराउनका लागि दुई रङको सिलिण्डरको प्रयोगमा कडाई गर्न लागिएको बताए । ‘मन्त्री ज्यू नै लाग्नु भएकोले यसपाली देखि रातो रङको सिलिण्डर घरेलु प्रयोजनका लागि प्रयोगमा आउँछ भन्ने हो’ उनले भने, ‘यसको आशय आर्थिक स्थिति राम्रो भएका घर परिवाको भन्दा गरिब घर परिवारले केही सहुलियत पाउने भन्ने हो ।’

निगमको वार्षिकोत्सवको अवसरमा आयोजित कार्यक्रममा बोल्दै उद्योग वाणिज्य तथा आपुर्ति मन्त्री मातृकाप्रसाद यादवले गरिबले खरिद गर्ने ग्यास र धनी मान्छेले खरिद गर्ने ग्यासको मुल्यमा भिन्नता हुनु पर्ने बताएका थिए ।

नेपाल सरकारका पूर्व पदाधिकारी, उद्योग, व्यवसायी र गरिब घर परिवारले प्रयोगमा ल्याउने ग्यासको मुल्य एउटै हुनु नहुने मन्त्री यादवको भनाई थियो ।