धनगढी – कानूनी उल्झनका बीच कैलाली उद्योग वाणिज्य संघले आइतबार नयाँ नेतृत्व पाएको छ ।

नक्कली सदस्यताको कानूनी उल्झनमा फसेको संघले आफ्नो ४६औं वार्षिक साधारण सभामार्फत् १८ सदस्यीय नयाँ नेतृत्व पाएको हो । संघको नक्कली सदस्यता छानबिनका लागि भन्दै केही व्यवसायीले उच्च अदालतमा रिट दायर गरेपछि वैशाखमै हुने साधारण सभा आइतबार सम्पन्न भई नयाँ नेतृत्व पाएको छ । रिटको सुनुवाई गर्दै अदालतले वैशाख २० गते अन्तरिम आदेश जारी गरेको थियो ।

यसैबीच साधारण सभाबाट पुष्पराज कुँवरको प्यानलका अधिकांश उम्मेदवार विजय भएका छन् । अध्यक्ष कुँवर १ हजार मत ल्याएर विजयी भएका हुन् । उनका निकटतम् प्रतिद्वन्द्वी रुपेश स्वाँरले ९३१ मत र डिल्लीराज अवस्थीले १७७ मतमै चित्ता बुझाउनुपर्‍यो ।

उपाध्यक्ष उद्योगतर्फ पुस्करराज ओझाले १ हजार ८० मत, उपाध्यक्ष वाणिज्यतर्फ गगनराज केसीले ९६० मत र उपाध्यक्ष वस्तुगततर्फ शिवराज कुँवरले ९५२ मत ल्याएर वियजी भएका छन् ।

महासचिवमा ओमबहादुर विष्टले १ हजार ८७ मत ल्याएर विजयी भएका छन् भने कोषाध्यक्षमा भीमराज ओझा (बब्बु) ले ९६६ मत ल्याएर विजयी भएका छन् ।

ओझा स्वाँर प्यानलबाट विजयी भएको संघले जनाएको छ भने सचिवमा सिद्धराज पनेरुले १ हजार ३६ मत ल्याएर विजयी भएका छन् ।

कुँवर प्यानलका अधिकांश निर्वाचित

मतदानमा ७ जना सदस्य पुष्पराज कुँवर प्यानलबाट विजयी भएका छन् भने ४ जना सदस्य रुपेश स्वाँर प्यानलबाट विजयी भएका छन् ।

विजयी सदस्यमध्ये केशवराज जोशीले ९३५ मत, लक्ष्मणराज पन्तले ९३१ मत, राधिका कुमारी चौधरीले ८८९ मत, मनोज अग्रवालले ८८३ मत, तिलक चन्द्र खतिवडाले ८४२ मत, सुरेन्द्रकुमार वोहोराले ८०८ मत र महेन्द्रकुमार सिंहले ७९९ मत प्राप्त गरेका छन् ।

स्वाँर प्यानलबाट विजयी सदस्यमध्ये तिलकबहादुर बोहोराले ९२१ मत, रवि कुँवरले ८८५ मत, श्यामराज जोशीले ८६८ मत र रुपेश खड्काले ८५० मत प्राप्त गरेको संघका कार्यालय प्रमुख ज्योति भट्टले जानकारी दिए ।

उनका अनुसार २ हजार ७०४ सदस्य संख्या रहेकोमा सम्पन्न निर्वाचनमा २ हजार २६१ मत खसेको थियो ।