काठमाडौं – एनआईसी एशिया बैंक लिमिटेडको अत्यन्त लोकप्रिय रहेकोे बचत निक्षेप योजना ‘प्रिमियम समुन्नती बचत खाता’ खोलेका ग्राहक राजकृष्ण श्रेष्ठको कात्तिक २० गते दुर्घटनामा परी असामयिक निधन भएकोले परिवारलाई बिमा रकम भुक्तानी गरिएको छ ।

खाता खोल्दा ५ लाख रुपैयाँ बराबरको स्वतः दुर्घटना बिमा हुने भएकाले बिमाको क्षतिपूर्तिबापत स्व. राजकृष्ण श्रेष्ठका छोरा रजतकृष्ण श्रेष्ठलाई क्षतिपूर्र्ति बापतको ५ लाख रुपैयाँको चेक बैंकले हस्तान्तरण गरेको छ ।

चेक बैंकका प्रमुख बजार व्यवस्थापन अधिकृत सन्तोषकुमार राठीबाट पुस २६ गते बैंकको केन्द्रिय कार्यालयमा हस्तान्तरण गरिएको छ । कार्यक्रममा राठीले बैंकको निक्षेप योजनाको क्षतिपूर्ति रकम खातावालको परिवारको चोटमा सानो भएपनि मलम लगाउन पाएकोमा आफू भावविह्वल भएको जनाए ।

बैंकलाई आमजनमानसले गरेको प्रगाढ विश्वास, अगाध स्नेह र बैंक प्रतिको भरोसाले गर्दा मुलुकभर २७० शाखा कार्यालय, २८९ एटीएम, ३७ वटा एक्सटेन्सन काउन्टर एवं २२ वटा शाखारहित बैंकिङ ईकाईमार्फत् बैंकिङ सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको छ । 

बैंकको वासलातको आकार २ सय १६ अर्बभन्दा बढी पुगेको छ भने कुल निक्षेप करीब १ सय ६९ अर्ब तथा कर्जा १ सय ४७ अर्ब पुगि निजी क्षेत्रबाट स्थापित बैंकहरूमध्ये नेपालको सबैभन्दा ठूलो बैंकको रुपमा आफ्नो पहिचान बनाउन सफल भइसकेको छ ।

हालसम्म बैंकमा ग्राहकको संख्या करीब १४ लाख रहेको छ । संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले पालना गर्दै आएको छ ।