जनकपुरधाम – २ नम्बर प्रदेश सरकारका मन्त्री विजयकुमार यादवले सचिव विद्यानाथ झालाई कुटपिट गर्दा एक जना सर्वसाधारण मन्त्रीकै कार्यकक्ष बाहिर थिए ।

सिरहा नगरपालिका–२२ हकपाडाका २४ वर्षीय शम्भुकुमार यादवले घटनाबारे जानकारी गराएका छन् । उनले मन्त्री यादवले सचिव झालाई कुटपिट गरेको बताए ।

तर यसअघि सभामुख सरोजकुमार यादव र सांसद उपेन्द्र महतोले सचिव झालाई मन्त्री यादवले कुटपिट नगरेको बताएका थिए ।

प्रत्यक्षदर्शी सर्वसाधारण शम्भुकुमार यादव घटना हुँदा मन्त्रीको स्वकीय सचिव बस्ने कक्षमा बसिरहेका थिए । ‘त्यतिकै बेला मन्त्री यादव ज्यूको कार्यकक्षबाट चिया ल्याउँदै सचिव झा म बसेको ठाउँमा आउनुभयो,’ प्रत्यक्षदर्शी यादवले लोकान्तरसँग भने, ‘उहाँले मेरो परिचय माग्नुभयो र मैले सरकारसँग सहयोग माग्न आएको मेरो कागजात सहितको फाइल हेर्न थाल्नुभयो ।’

केहीबेरपछि मन्त्रीको कार्यकक्षबाट सचिवलाई भित्र बोलाइएको थियो । ‘सचिव ज्यू भित्र गएको केही मिनेटमै भित्र चर्को आवाजमा हो–हल्ला हुन थाल्यो,’ यादवले भने, ‘त्यसपछि सचिव ज्यू बाहिर आउँदा उहाँको गालामा रातो डाम देखिन्थ्यो, गालामा काटिएकोजस्तो चिनो समेत देखिएको थियो ।’

उनले अगाडि भने, ‘सचिव ज्यू बाहिर आउँदै मधेशी मन्त्रीले मधेशी सचिवलाई कुट्ने, म पनि मधेश आन्दोलनकारी हो, म पनि जनकपुरकै लोकल हो भन्दै मन्त्री ज्यूलाई तथानाम गालीगलौज गर्न थाल्नुभयो ।’

यादव मधेश आन्दोलन बेला जनकपुरको जानकी मन्दिर दर्शन गर्न राष्ट्रपति विद्यादेवी भण्डारी आउँदा प्रहरीले चलाएको प्लास्टिकको गोली लागेर घाइते भएका थिए । २०७२ पुस १ गते उनी घुँडा र खुट्टामा गोली लागेर घाइते भएकाले प्रदेश सरकारसँग आर्थिक सहयोग माग्नका लागि आर्थिक मामिला तथा योजना मन्त्री विजय यादवसँग भेट गर्न गएका थिए ।

‘आउँदो माघ ११ गते काठमाडौंको वीर अस्पतालमा शल्यक्रिया हुनेछ,’ उनले भने, ‘त्यसैका लागि आफ्नो गृहजिल्ला सिरहाका मन्त्री ज्यूसँग मद्दत माग्न आएको थिएँ ।’ तर घटना भएपछि मन्त्रीसँग भेट हुन सकेको उनले बताए ।

हेर्नुस् भिडियो कुराकानी :