काठमाडौं –  सिटिजन्स बैंक इन्टरनेसनल लिमिटेडको बाह्रौ वार्षिक साधारणसभा सोमवार सम्पन्न भएको छ ।

सञ्चालक समितिका अध्यक्ष डा. शंकरप्रसाद शर्माको अध्यक्षतामा काठमाडौंकोे लैनचौरमा सभा सम्पन्न भएको हो ।

साधारण सभाले आर्थिक वर्ष २०७४/७५ को सञ्चालक समितिको वार्षिक प्रतिवेदनमा छलफल गरी प्रतिवेदन पारित गरेको छ । बैंक र सहायक कम्पनी सीबीआईएल क्यापिटल लिमिटेड समेतको लेखापरीक्षकको प्रतिवेदनसहित २०७५ असार मसान्तको वासलात, आर्थिक वर्ष २०७४/०७५ को नाफा नोक्सानीको हिसाब तथा नगद प्रवाह विवरण लगायतका एकीकृत वित्तीय विवरण छलफल गरी स्वीकृत भएको छ ।

सिटिजन्स बैंक इन्टरनेसनल लिमिटेडले आर्थिक वर्ष २०७४/७५ को मुनाफाबाट आफ्ना  शेयरधनीलाई २९ करोड १४ लाख ४५ हजार ७ सय ७३ (करीब ३.६ प्रतिशत) बोनस शेयर तथा १३ करोड १३ लाख ५६ हजार १ सय ४३ रुपैयाँ (करीब १.६ प्रतिशत) नगद लाभांश दिने भएको छ ।

सभाका अध्यक्षले शेयरधनीबाट प्राप्त सुझाव अनुसार बैंकको कामकारवाही सञ्चालन गर्नेमा विश्वास दिलाउँदै भविष्यमा बैंकले अझ बढी प्रगति हासिल गर्न सक्ने विश्वास सभालाई गराए । शेयरधनी तथा बैंकसँग सम्बन्धित अन्य महानुभावले पुर्याएको सहयोगको लागि धन्यवाद प्रकट गर्दै भविष्यमा समेत सहयोग प्राप्त हुनेमा आशा प्रकट गरिएको छ ।

नेपाली जनताको घरदैलोमा बैंकिङ सेवा पुर्याउँदैै आएको सिटिजन्स बैंक इन्टरनेसनल लिमिटेडले देशैभर फैलिएका आफ्ना ८१ वटा शाखा, ७५ वटा एटीएम र ९९ वटा शाखारहित बैंकिङ एकाईबाट करीब ४ लाख  ग्राहकलाई आधुनिक बैंकिङ सेवा प्रदान गर्दै आएको छ ।

आफ्नो ग्राहकलाई विभिन्न किसिमका निक्षेप तथा कर्जा सुविधा, रेमिट्यान्स सेवा, बैंकास्योरेन्स, आस्बा, ड्राफ्ट, भिसा एटीएम कार्ड सेवा, भिसा इन्टरनेसनल डलर कार्ड सेवा, साथै कुनै पनि शाखाबाट रकम झिक्न र राख्न सकिनेजस्ता सुविधा पनि उपलब्ध गराउँदै आएको छ ।

शाखासँगको समन्वय, निगरानी, संस्थागत सुशासन, जोखिम व्यवस्थापन एवं गुनासो सुनुवाईजस्ता कार्य प्रादेशिक कार्यालयले छिटो, छरितो, चुस्त र दुरुस्त रूपमा सम्पादन गर्ने उद्देश्यले बैंकले ७ वटै प्रदेशमा प्रादेशिक कार्यालयको स्थापना गरिसकेको छ ।