काठमाडौं– आउँदो शुक्रबार अर्थात माघ ४ गतेबाट प्रदर्शनमा आउन लागेको चलचित्र ‘गरुड पुराण’ सेन्सर पास भएको छ । केन्द्रिय चलचित्र जाँच समितिले यो चलचित्रलाई सोमबार साँझ सेन्सर गरेको हो ।

समितिले यो चलचित्रलाई बालबालिकाले आफ्ना अभिभावकको साथमा हेर्न मिल्ने गरी ‘प्यारेन्टल गाईडेड’ (पिजी) सर्टिफिकेट दिएको छ । 

‘गरुड पुराण’लाई सुवास कोईरालाले निर्देशन गरेका हुन् । निर्देशक कोईरालाका अनुसार चलचित्रमा ब्याण्ड बाजा बजाउने एउटा समूह र उनीहरुको परिवारले गरेको संघर्षको रमाईलो कथा उठाईएको छ । 

‘माघ महिना विवाहको बेला भएको र यो चलचित्र बाजा बजाउनेहरुको कथामा आधारित रहेकाले पनि चलचित्रलाई विवाहको मौसम पारेर रिलिज गर्न लागिएको हो । चलचित्रले दर्शकलाई पूर्ण मनोरञ्जन दिनेमा हामी विश्वस्त छौं’ –निर्देशक कोइरालाले भने ।

यो चलचित्रमा अभिनेता नाजिर हुसेन ब्याण्ड बाजा बजाउने भूमिकामा छन् । यस्तै कर्मा शाक्य, प्रियंका सिंह ठकुरी, कामेश्वर चौरासिया, प्रविण खतिवडा, प्रकाश घिमिरे, रश्मी भट्ट, लुनिभा तुलाधर, बसन्त भट्ट, कृष्णभक्त महर्जन, जाहन्वी वोहोरा लगायतको अभिनय छ । यसै चलचित्रमार्फत प्रियंकाले चलचित्र क्षेत्रमा डेब्यू गरेकी हुन् ।

कसम नेपालको कथा रहेको चलचित्रमा आकाश बराल, बिनोद खतिवडा, सुवास कोइरालाको पटकथा र आकाश बरालको संवाद रहेको छ । सुशन प्रजापति प्रस्तुतकर्ता रहेको चलचित्रलाई अजित प्रजापति र अशोक गौतमले संयुक्त रुपमा निर्माण गरेका हुन ।

चलचित्रमा रेनेशा बान्तवा राइको कोरियोग्राफी, कोशिस क्षेत्रीको संगीत, कोशिस र मनिषा पोखरेलको गायन रहेको छ । सुसन प्रजापतिको छायाँकन रहेको चलचित्रमा उज्ज्वल ढकालको सम्पादन छ ।