काठमाडौं— नेपाली कांग्रेसको भातृ संगठन नेपाल विद्यार्थी संघको वर्तमा कार्यसमितिको थपिएको कार्यकाल बुधबार सकिँदैछ । कार्यसमितिको पदावधी गत भदौ २ गते नै सकिए पनि विधानमा भएको व्यवस्था अनुसार तीन महिना थप भएको थियो ।

थपिएको समयावधीमा पनि अधिवेशन हुन नसकेपछि माउ पार्टी कांग्रेसले गत मंसिरमा विधान संसोधन गरेर तीन महिनाको समयावधीलाई ५ महिनाको बनाएको थियो । तर, म्याद थप गर्ने आधिकारिक निकाय नेपाली कांग्रेसको केन्द्रीय कार्यसमितिको बैठक १० माघमा मात्रै बोलाइएकाले अध्यक्ष नैनसिंह महर नेतृत्वको समितिको वैधतामा प्रश्न उठ्ने देखिएको छ । 

नैनसिंह महर नेतृत्वको कार्यसमितिले आफ्नो कार्यभित्र अधिवेशन नगराई समयावधी गुजारेको हो । कार्यकाल सकिएको ५ महिना सकिँदा पनि नेतृत्वले अधिवेशन गराउन नसकेको भन्दै असन्तुष्ट पक्षले पार्टी नेतृत्वलाई दबाब स्वरुप राजीनामा बुझाई सकेका छन् । 

उपाध्यक्षहरू पुष्पकुमार शाही, सञ्जय यादव, विकास केसी, महामन्त्री सरोज थापा, सहमहामन्त्री प्रेमराज जोशी, प्रकाश घिमिरे र अच्युतराज कलौनीले २७ पुसमा सभापति देउवालाई राजीनामा बुझाएका थिए । यता, सहमहामन्त्री हरिहर शर्मा नेतृत्वमा ४५ सदस्यीय टोलीले आइतबार नेता रामचन्द्र पौडेललाई राजीनामा बुझायो । नेविसंघमा पदाधिकारी वा केन्द्रीय सदस्यले अध्यक्षलाई राजीनामा बुझाउनुपर्ने प्रावधान छ । 

नेपाल विद्यार्थी संघको केन्द्रीय कार्यसमितिको म्याद सकिएपछि अब कसरी अगाडि बढ्ने भन्ने बारेमा १० माघमा आह्वान भएको कांग्रेस केन्द्रीय समितिमा छलफल हुने बताइएको छ । आगामी फागुनमा त्रिविका आंगिक तथा सम्वन्धन प्राप्त क्याम्पसमा स्ववियु निर्वाचन हुने भएकाले स्ववियुको निर्वाचनपछि मात्र महाधिवेशन गर्ने नेतृत्वको तयारी छ ।