इलाम— इलाम अस्पतालमा भर्ना भएका प्रा.डा. गोविन्द केसीलाई धरान लाने तयारी भएको छ । डा. केसीको स्वास्थ्य अवस्था जटिल बन्दै गएपछि १ नम्बर प्रदेश प्रदेश स्वास्थ्य निर्देशनालयले धरानस्थित बीपी कोइराला स्वास्थ्य विज्ञान प्रतिष्ठानका डाक्टरलाई तयारी अवस्थामा राखेको छ । 

उनको उपचारका लागि विशेषज्ञ चिकित्सकसहित भेन्टिलेटर तयारी अवस्थामा राखिएको बीपी प्रतिष्ठानले जनाएको छ । तर, डा. केसी बाहिरको अस्पतालनमा नजाने अडानमा छन् । इलाम अस्पतालका निमित्त मेडिकले सुपरिटेन्डेन्ट डा. वृजेन्द्रकुमार साहले यसबारे छलफल गरेर निर्णय लिइने बताए ।

उनलाई सुईमार्फत एन्टिबायोटिक औषधि लिन थालेपछि तत्काललाई जटिलता केही कम भएको छ । उपचारमा संलग्न चिकित्सका अनुसार यसअघि औषधि लिन अस्वीकार गरेका डा. केसीले मंगलबार बेलुकादेखि एन्टिबायोटिक लिन राजी भएका हुन् । 

सुईमार्फत एन्टिबायोटिक दिन थालेपछि तत्काललाई थप जटिलता टरे पनि डा. केसीलाई कुनै पनि बेला आईसीयूमा राख्नुपर्ने खतरा भने बाँकी नै रहेको डा. साहको भनाइ छ । तर, इलाम अस्पतालमा आईसीयू सुविधा नभएकाले उक्त सुविधाका लागि इलाम बाहिर लानुपर्ने अवस्था छ । चिकित्सा शिक्षा विधयेकमा आफ्ना माग नसमेटिएको भन्दै डा केसी इलाममा अनशन बसेका हुन् ।