जनकपुरधाम – २ नम्बर प्रदेशका आर्थिक मामिला तथा योजनामन्त्री विजय यादवले सचिव विद्यानाथ झालाई कुटपिट गरेको विरोधमा कर्मचारी आन्दोलित भएका छन् ।

प्रदेश सरकार मन्त्रीमाथि कारवाही गर्न संवेदनशील नभएको भन्दै बुधवार हातमा कालोपट्टि बाँधेर बिहान १० बजेदेखि ११ बजेसम्म ‘पेन डाउन’ गरेका छन् ।

मन्त्रालयमा कुराकानी गर्न उपस्थित भएका उद्योग, पर्यटन, वन तथा वातावरण मन्त्रालयका सचिव विद्यानाथ झालाई मन्त्री यादवले कुटपिट गरेका थिए । मन्त्रीको कुटपिटविरुद्ध प्रदेशका कर्मचारी आन्दोलित भएका छन् ।

प्रदेश सरकारले घटनाको छानबिन र दोषीमाथि कारवाही गर्न तदारुकता नदेखाए दिनदिनै ‘पेन डाउन’ आन्दोलन १–१ घण्टा थप्दै जाने मधेश निजामती कर्मचारी मञ्चका केन्द्रीय महासचिव बेचन महतोले बताए ।

गरीबी निवारण कोषको कार्यक्रम आफन्तलाई नदिएको भन्दै मन्त्री यादवले कुटपिट गरेको सचिव झाको आरोप छ । प्रदेश सरकारले घटनाको छानबिन गर्न  समिति गठन गरेपनि समितिको कामप्रति कर्मचारी असन्तुष्ट छन् ।