काठमाडौं – एनआईसी एशिया बैंक लिमिटेडले चालू आर्थिक वर्ष २०७५/७६ को दोस्रो त्रैमासिकको वित्तीय विवरण बुधवार सार्वजनिक गरेको छ ।
वित्तीय विवरणका परिसूचकहरू अत्यन्त उत्साहजनक रहेका छन् । 

बैंकले चालू आर्थिक वर्षको दोस्रो त्रैमासिकसम्म वार्षिक बिन्दुगत आधारमा १७२ प्रतिशत (१ अर्ब ३५ करोड रुपैयाँ) ले वृद्धि गरी २ अर्ब १४ करोड रुपैयाँको सञ्चालन मुनाफा आर्जन गर्न सफल भएको छ ।

बैंकको खुद मुनाफातर्फ वार्षिक बिन्दुगत आधारमा १६४ प्रतिशत (९४ करोड रुपैयाँ) को वृद्धिसहित १ अर्ब ५१ करोड रुपैयाँको खुद मुनाफा आर्जन गर्न सफल भएको छ । गत वर्षको सोही अवधिको खुद मुनाफा ५७.१८ करोड रुपैयाँ रहेको थियो । 

बैंकले वार्षिक बिन्दुगत आधारमा ५३ प्रतिशत (७४ अर्ब रुपैयाँ) को वृद्धि गरी वासालातको आकार २१४ अर्ब रुपैयाँ पुर्याउन सफल भएको छ । जसअन्तर्गत कर्जातर्फ वार्षिक विन्दुगत आधारमा ४८ प्रतिशत (४८ अर्ब रुपैयाँ) को वृद्धि गरी १४९.३ अर्ब रुपैयाँ र निक्षेप संकलनतर्फ वार्षिक विन्दुगत आधारमा ४६ प्रतिशत (५५ अर्र्ब रुपैयाँ) को वृद्धि गरी १७५.७६ अर्ब रुपैयाँ पुर्याउन सफल भएको छ । उक्त वृद्धि नेपाली बैंकिङ ईतिहासमा कुनै पनि बैंकले वार्षिक विन्दुगत आधारमा हासिल गरेको वृद्धिका हिसाबले हालसम्मकै उच्च वृद्धि हो । 

बैंकलाई आम जनमानसले गरेको प्रगाढ विश्वास, अगाध स्नेह र बैंकप्रतिको भरोसाले गर्दा मुलुकभर २७३ शाखा कार्यालयहरु, २८९ एटिएम, ३७ वटा एक्सटेन्सन काउण्टर एवं २२ वटा शाखारहित बैंकिङ इकाईमार्फत् बैंकिङ सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको छ ।

हालसम्म बैंकमा ग्राहकको संख्या करीब १४ लाख ५० हजार रुपैयाँ रहेको छ । संस्थागत सुशासन, जोखिम व्यवस्थापन र आन्तरिक नियन्त्रण प्रणालीको उत्कृष्ट अभ्यासलाई बैंकले परिपालना गर्दै आएको छ ।