काठमाडौं — चीनले चन्द्रमामा कपासको बिउ उमार्न सफलता पाएको छ । चीनले पठाएको रोभर छाङई–४ मा कपासको बिउ उम्रेको हो । 

चन्द्रमामा कुनै बिरुवा उम्रेको यो पहिलोपटक हो । वैज्ञानिकहरूले मंगलवार यसको जानकारी दिए । उनीहरूले छिट्टै आलुको बिउ पनि उम्रिने आशा गरेका छन् । 

चोङकिङ विश्वविद्यालयको एड्भान्स्ड टेक्नोलोजी रिसर्च इन्स्टिच्युटले जारी गरेको तस्वीर शृंखलाअनुसार, यो अंकुर एक डब्बाभित्र जालीदार संरचनामा हुर्केको हो । 

यो प्रयोगको डिजाइनको नेतृत्व गर्ने शाइ गेङशिनले पहिलोपटक चन्द्रमाको सतहमा बिरुवाको विकासका लागि प्रयोग गरिएको बताए । छाङई–४ जनवरी ३ मा चन्द्रमाको नदेखिएको भागमा उत्रेको थियो । 

चोङकिङ विश्वविद्यालयका वैज्ञानिकहरूले पानी र माटो भरिएको एक डब्बा पठाएका थिए । त्यो डब्बा १८ सेन्टीमिटरको छ । त्यसभित्र कपास, आलु र सर्स्युँको बिउका साथै फ्रुट फ्लाईका अण्डा र ईस्ट पनि पठाइएको थियो । 

विश्वविद्यालयका अनुसार, अन्तरिक्षयानबाट पठाइएका तस्वीरमा कपासका अंकुर गजबले विकसित भएको तर अन्य बिरुवाका बिउ अंकुरित भएको खबर नपाइएको बताए । 

अहिलेसम्म अमेरिका, रुस र चीनले मात्र चन्द्रमामा यान उतारेका छन् । भारतीय अन्तरिक्ष अनुसन्धान संगठन इसरोको चन्द्रयान–१ चन्द्रमामा उतारिएको छ । 

एजेन्सी