काठमाडौं – प्रतिनिधिसभाको शिक्षा तथा स्वास्थ्य समितिबाट पारित चिकित्सा शिक्षा विधेयक संसद्‍बाट हुबहु पारित हुनुपर्ने मागसहित अनशनरत विजय थापाको समर्थनमा विद्यार्थीहरूको एक समूहले त्रिवि शिक्षण अस्पताल महाराजगञ्जमा शान्तिपूर्ण प्रदर्शन गरेको छ ।

आफूसँग गरिएको सहमति विपरीत संसद्ले चिकित्सा शिक्षा विधेयकमा तोडमोड गरेको विरोधमा अनशनरत डा. गोविन्द केसीभन्दा ठ्याक्कै विपरीत (चिकित्सा शिक्षा विधेयकका सम्बन्धमा) माग राखेर थापाले केसीसँगै अनशन शुरू गरेका हुन् ।

गत पुस २५ गते इलाम नै पुगेर अनशन थालेका थापालाई शुक्रवार मध्याह्न काठमाडौं ल्याइएको हो । डा. केसीलाई त्यसको केही घण्टाअघि काठमाडौं अवतरण गराइएको थियो ।

केसीलाई आईसीयूमा राखिएको छ भने थापालाई हालका लागि इमर्जेन्सी वार्डमा राखिएको छ । उनको पनि अवस्था जटिल भएकाले शुक्रवार बेलुकासम्ममा आईसीयूमा सार्ने तयारी भइरहेको उपचारमा संलग्न चिकित्सकहरूले बताएका छन् ।

थापाको समर्थनमा प्रदर्शन गरेका विद्यार्थीहरूले डा. केसीले राखेका अधिकांश मागहरू पूरा भइसकेको भन्दै शिक्षा क्षेत्रलाई बदनाम नगराउन माग गरे । मागहरू पूरा भइसकेको अवस्थामा डा. केसीको अनशन औचित्यहीन भइसकेकाले आफूहरूले थापाको मागप्रति ऐक्यबद्धता जनाएको प्रदर्शनमा संलग्न विद्यार्थीहरूका अगुवा सञ्जय दवाडीले लोकान्तरलाई बताए ।

संसद्‍मा दर्ता भएको चिकित्सा शिक्षा विधेयक हुबहु पारित हुनुपर्ने, काठमाडौं उपत्यका बाहिर देशैभरी मोडिकल कलेज खोल्ने वातावरण बनाउनुपर्ने, सरकारी तलब र सेवा सुविधा लिएर राजनीति गर्ने सरकारी कर्मचारीलाई कारवाही गर्नुपर्ने लगायतका ९ बुँदे माग थापाको छ ।

उता डा. केसीले भने एउटा विश्व विद्यालयले ५ भन्दा बढी मेडिकल कलेजलाई सम्बन्धन दिन नहुने अडान राखेका छन् ।