सुर्खेत- नेपाल कम्युनिष्ट पार्टी (नेकपा) कर्णाली प्रदेशको  संसदीय दलमा ‘नाटक’ मञ्चन भइरहेको आरोप नेकपाका प्रदेश सभा सदस्यले लगाएका छन् ।

नेकपाका प्रदेश सांसदले प्रमुख सचेतक र सचेतक नियुक्ति हुन नसकेको भन्दै आपत्ती जनाएका छन् । नेकपाका एक जना प्रदेश सांसदले  नेकपा भित्र कहिल्यै संसदीय दलको नेता चयनमा त कहिल्यै संसदीय दलको प्रमुख सचेतक र सचेतक चयनमा किचलो देखिएको बताएका हुन् ।

‘मुख्यमन्त्री महेन्द्र बहादुर शाहीले उतिबेला संसदको काममा असहजता भएको बताउँदै आफुलाई संसदीय दलको नेता चयन गर्न बारम्बार दाबाब तथा माग गर्दै आउनु भएको थियो’ नेकपाका एक सांसदले भने, ‘पुस ३ गते नेकपाको संसदीय दलको नेता भएसंगै अहिले उहाँ सुत्नु भएको छ । प्रमुख सचेतक र सचेतकसम्म उहाँले चयन गर्न सक्नु भएको छैन ।’

प्रदेश सभामा दुई तिहाइ भन्दा बढी सांसद रहेकोमा विगतको सहमति अनुरुप प्रमुख सचेतकमा नेकपाका केन्द्रीय सदस्य गुलावजंग शाह तथा सचेतकमा सीता नेपालीलाई बनाउने भनिएको थियो । तर अहिलेसम्म मुख्यमन्त्रीले कसैलाई पनि पत्र दिन सकेका छैनन् ।