काठमाडौं -प्रमुख प्रतिपक्षी दल नेपाली कांग्रेसले हंगामा गरेपछि प्रतिनिधिसभाको बैठक १५ मिनेटका लागि स्थगित भएको छ ।

पूर्वप्रधानमन्त्री एवं कांग्रेसका पूर्वसभापति द्वय गिरिजाप्रसाद कोइराला र सुशील कोइरालाको नाममा स्थापना हुन लागेका अस्पताल विघटन गर्न खोजेको भन्दै कांग्रेसले सदनमा नाराबाजी गरेको हो ।

सभामुखले कृष्णबहादुर महराले पटक-पटक आग्रह गर्दा पनि कांग्रेसको विरोध नरोकिएन । ‘माननीय सदस्यहरू बेलमा आउनुपर्ने अवस्था भएको छैन । माननीय सदस्यहरूले उठाउनुभएको विषयमा हिजो नै सरकारको विशेष ध्यानाकर्षण गराइसकेको छु । माननीय सदस्यहरू म सदनको कारवाही अगाडि बढाउन चाहन्छु,’ सभामुख महराले भने पनि कांग्रेस सांसदहरूले नाराबाजी गरिरहे ।

बेल घेर्न पुगेका कांग्रेस सांसदहरूको विरोध नरोकिएपछि सभामुख महराले संसद् बैठक १५ मिनेटका लागि स्थगित गरेका हुन् ।