पोखरा–विभिन्न व्यक्तिबाट २ करोड ५० लाख रुपैयाँ ठगी गरेको अभियोगमा कास्की प्रहरीले एक महिलालाई पक्राउ गरी सार्वजनिक गरेको छ ।

पक्राउ पर्नेमा बाग्लुङ वडीगार्ड गाउँपालिका–८ घई भई पोखरा महानगरपालिका–२६ डेरा गरी बस्ने वर्ष ४२ की स्नेहा भन्ने सरिताकुमारी राना रहेकी छिन् ।

जिल्ला प्रहरी कार्यालय कास्कीले मंगलबार पत्रकार सम्मेलन गरी रानालाई सार्वजनिक गरेको हो ।

ठगीमा संलग्न रहेको अभियोगमा पक्राउ परेकी रानालाई काठमाडौंको दरबारमार्गबाट पक्राउ गरिएको जिल्ला प्रहरी कार्यालय कास्कीले जनाएको छ ।

आफ्नो परिवार बेलायत तथा सिंगापुर रहेको र अहिले आफूलाई आपतविपत् गरेकाे भन्दै विभिन्न प्रलोभन देखाउँदै  रानाले विभिन्न व्यक्तिहरुसँग न्यूनतम १० लाखदेखि १ करोड ७० लाख रुपैयाँसम्म रकम सापटी मागेको अनुसन्धानमा खुल्न आएको कास्कीका प्रहरी प्रमुख प्रहरी उपरीक्षक ओमबहादुर रानाले जानकारी दिए ।

उनका अनुसार विभिन्न पीडित व्यक्तिले आफू ठगिएको भन्दै प्रहरी कार्यालयसमक्ष किटानी जाहेरी गरेपछि रानाको खोजीकार्य तीव्र पारिएकोमा प्रहरीले पक्राउ गर्न सफल भएको हो ।

पक्राउ परेकी रानाले चिनजानका विभिन्न आठ जना व्यक्तिहरुबाट घरजग्गा खरिद गर्न, जग्गासँग घर साटी दिने जस्ता विभिन्न प्रलोभन देखाउँदै सो बराबरको रकम ठगी गरेको प्रहरी उपरीक्षक रानाले बताए ।

पक्राउ परेकी रानाले फ्लाट भाडामा लिई काम गर्ने मानिससमेत राखेर निजी गाडी चलाउँथिन् ।