काठमाडौं – वर्षा राउत अहिलेकी व्यस्त अभिनेत्री हुन् । ‘नाइँ नभन्नू ल ४’ बाट सिने नगरीमा डेब्यू गरेकी वर्षाले त्यसयता थुप्रै चलचित्रमा अभिनय गरेसकेकी छन् ।

उनी अभिनित चलचित्र ‘गोपी’ हिजो शुक्रवारबाट प्रदर्शनमा आएको छ । यता रोकिएको उनको अर्को चलचित्र ‘जात्रै जात्रा’को छायाङ्कन पनि भइरहेको छ ।

वर्षासँग लोकान्तरका लागि सुशील नेपालले ‘गोपी’ र उनको निजी जीवन लगायत प्रसंगमा रहेर छोटो कुराकानी गरेका छन् ।

प्रस्तुत छ, कुराकानीको सम्पादित अंश :

चलचित्र‘गोपी’ हलमा लागिरहेको छ । कस्तो महसूस भइरहेको छ ?

चलचित्रलाई लिएर एकदमै उत्साहित छु, उत्तिकै नर्भस पनि । चलचित्र हेरेका दर्शकहरूले रुचाउनुभएको छ ।

चलचित्रमा तपाईंको भूमिकाबारे बताइदिनुस् न?

‘गोपी’मा म भेटेरिनरी डाक्टरको भूमिकामा प्रस्तुत भएकी छु । आजसम्म कमेडी जनराका चलचित्रहरू गरिरहेकी थिएँ ।

‘गोपी’मा दर्शकले मलाई विगतका भन्दा भिन्न भूमिकामा देख्न पाउनुहुनेछ ।

लगातार चलचित्रहरू आइरहेका छन्, ‘गोपी’ तपाईंको करिअरको विशेष चलचित्र हो वा एउटा नियमित चलचित्र ?

हरेक चलचित्रको भूमिका फरकफरक नै हुन्छ । बनाउने तरिका, कथादेखि लिएर सबै कुराहरू हरेक चलचित्रमा फरक पाउँछौं । यो चलचित्र के कारणले विशेष छ भन्छु भने, आजसम्म मैले प्रायः कमेडी चलचित्रहरू गरिरहेकी छु । ‘गोपी’ गम्भीर विषयमा बनेको चलचित्र हो । अहिले गाईपालक किसानहरूले यसको कथा निकै मन पराइरहनुभएको छ । नेताहरूले पनि चलचित्रप्रति चासो देखाउनुभएको छ ।

अब चलचित्र दर्शकमाझ पुगिसकेको छ । उहाँहरूले कस्तो प्रतिक्रिया दिनुहुन्छ, हेरौं । तर मेरो तर्फबाट ‘गोपी’लाई एउटा विशेष चलचित्र भन्छु ।

‘गोपी’सँगै अन्य दुई नेपाली चलचित्र पनि प्रदर्शनमा आएका छन् । एकसाथ तीन चलचित्र दर्शकको लागि आवश्यकता हो ?

नेपाली चलचित्रहरू नै धेरै बनिरहेका छन् । यो दर्शकको आवश्यकताभन्दा पनि यसमा अरू उपाय छ जस्तो लाग्दैन । किनभने, यो हप्ता रिलिज भएन भने अर्को हप्ता फेरि त्यसैगरी नै अरू नेपाली चलचित्रहरूसँग भिड्नुपर्छ ।

यसले चलचित्र क्षेत्रलाई त असर गरिरहेको छ नि?

असर त गर्छ नै । गरिरहेकै छ । चलचित्रहरू निर्माण भइरहेका छन् । एकैदिन धेरै चलचित्रहरू प्रदर्शनमा आउँदा शो बाँडिन्छ । हामी कलाकारहरू त यसमा के गर्न सक्छौं र ?

चलचित्रमा व्यस्त बनिरहनुभएको छ । आफ्नो कलाकारिता यात्रालाई फर्केर हेर्दा कस्तो लाग्छ?

खुशी लाग्छ । जे होस्, मैले एउटा म्यूजिक भिडियो पनि एउटा साइटको कोरसजस्तो भएर शुरूवात गरेकी थिएँ । अहिले दर्शकहरूको माया पाउँदै गइरहेकी छु । शुरुवाती कुराहरू सम्झँदा अहिले खुशी लाग्छ ।

शुरुवाती चरणमा हेपिएर काम गर्नुपर्‍थो । धेरैजनाले हेप्नुहुन्थ्यो । तर, अहिले उहाँहरूले नै रेस्पेक्ट गर्नुहुन्छ । त्यो रेस्पेक्ट म एउटा स्थानमा पुगेर मात्र पाएको जस्तो लाग्छ । शुरूवाती चरणमा त्यस्ता कुराहरूले चाहिँ केही दुःखी बनाउँथ्यो ।

चलचित्रमा डेब्यू गर्दै गर्दा म यहाँसम्म पुग्छु भन्ने सोच्नुभएको थियो?

पहिलो चलचित्र गर्दा यहाँसम्म पुग्छु भन्ने सोचेकी थिइनँ । म चलचित्रमा आइसकेपछि जति पनि चलचित्र गरेँ, दर्शकहरूले रुचाउनुभयो । दर्शकको नोटिसमा पर्दै गएँ । मैले आफ्नो तर्फबाट पनि मेहेनेत गर्दै गएँ ।

मैले एकदिन पर्दाभित्र आउँछु भनेर त पहिल्यैदेखि सोचिरहन्थेँ । तर, यसरी रेस्पेक्टेड कलाकारहरूसँग स्क्रिन शेयर गर्न पाउँछु भनेर चाहिँ सोचेकी थिइनँ ।

वर्षालाई चलचित्र खेलाउन निर्माता/निर्देशकको ओइरो लागिरहेको होला है ?

धेरै निर्माता/निर्देशकहरू स्क्रिप्ट लिएर आउनुहुन्छ । कुनैकुनै चलचित्रको स्क्रिप्ट राम्रो लाग्छ । तर ती चलचित्र केही कारणले मिल्दैनन् । कति स्क्रिप्ट राम्रो लागेर पनि गर्न मन लाग्दैन । चलचित्रमा अभिनय गर्नुअघि धेरै कुराहरू हेर्नुपर्ने हुन्छ ।

चलचित्रमा अनुबन्ध हुनुअघि के–के कुरा हेर्नुहुन्छ ?

पहिलो त टीम नै हेर्छु । त्यसपछि स्क्रिप्ट हेर्छु । टीम राम्रो छ, स्क्रिप्ट हेर्दै जाँदा आफ्नो क्यारेक्टर हेर्छु । टीम, स्क्रिप्ट र आफ्नो क्यारेक्टर चित्त बुझ्यो भने मात्र 'ओके' हुन्छु ।

अनुबन्धित भइसकेपछि पात्रको तयारी कसरी गर्नुहुन्छ?

पात्रको तयारीका लागि स्क्रिप्ट राम्रोसँग पढ्छु । अहिलेसम्म मलाई धेरै वर्क गर्नुपर्ने, पात्रका लागि धेरै नै डुब्नुपर्ने खालको स्क्रिप्ट नै आइसकेको छैन जस्तो लाग्छ । धेरैजसोमा स्क्रिप्ट पढिसकेपछि पात्रको केही तयारी भने गर्ने गरेकी छु ।

‘गोपी’को हकमा भने मैले रियल भेटेरिनरी डाक्टरहरूलाई नै भेटेर कसरी गर्ने भनेर सल्लाह लिएको थिएँ ।

छोटो समयमै धेरै चलचित्रहरू गर्नुभयो । अझै पनि यस्तो खालको क्यारेक्टर चाहिँ गर्न पाए हुन्थ्यो भन्ने लागेको छ?

मलाई महिला प्रधान चलचित्रहरू गर्न मन छ । कलाकार भइसकेपछि मलाई यो गर्न मन छ भनेर पनि नहुने । हेरौं, काम गर्दै जाउँ । आउँदा दिनमा त्यस्ता चलचित्र पनि गरिएला ।

फागुनमा विवाह गर्दै हुनुहुन्छ, दर्शकलाई लागेको हुनसक्छ विवाहपछि वर्षा कतै चलचित्र क्षेत्रबाटै हराउने त होइन ? यसबारे खुलाइदिनुहोस् न ।

प्लिज, यो प्रश्न नगर्नु न ! यो प्रश्न सुनेर मलाई एकदमै रिस उठछ् । यसको उत्तर दिँदादिँदा थाकिसकेँ । मलाई यसको उत्तर नै दिनु छैन । यसमा मैले भन्नुपर्ने कुराहरू पनि भनिसकेकी छु । अब त जवाफको लागि बिहेपछि काम गरेरै देखाउनुपर्छ ।