काठमाडौं — बलिउड अभिनेत्री कंगना रनावत 'मणिकर्णिका : द क्वीन अफ झांसी'मा आफ्नो गजबको अभिनयका कारण अहिले चर्चाको केन्द्रमा छिन् । 

अभिनयका साथै कंगनाले उक्त फिल्म निर्देशन पनि गरेकी थिइन् । कृष नामक निर्देशकबाट फिल्म निर्देशन हत्याएको आरोप लागेपछि उनी विवादमा पनि परिन् । 

अहिले कंगनाले आफ्नै बायोपिक निर्देशन गर्ने खबर आइरहेको छ । मुम्बई मिररको एक रिपोर्टअनुसार, कंगना आफ्नो जीवनीलाई पर्दामा उतार्न चाहन्छिन् । बाहुबली फिल्मका पटकथा लेखक केभी विजेन्द्र प्रसादले यसको कथा लेख्नेछन् र कंगनाले निर्देशन गर्नेछिन् । फिल्मको प्रिप्रोडक्सन कंगनाको आगामी फिल्म 'पंगा' र 'मेन्टल है क्या' पछि शुरू हुनेछ । 

कंगनाको बायोपिक आउने भएपछि मानिसहरूले फिल्ममा हृत्तिक रोशन र करण जोहरको भूमिकामा पनि कलाकारहरू देखिनेछन् कि भनी सोधिरहेका छन् । 

फिल्मका विषयमा कंगनाले भनिन्, ‘हो, मेरो अर्को निर्देशकीय प्रयास मेरै जिन्दगीमा आधारित छ । तर यसले कुनै पनि पात्रलाई कालो वा सेतो रूपमा देखाउने प्रोपागान्डा रच्नेछैन । मेरो हृदयनिकट रहेको जिन्दगीको यात्रालाई यसले देखाउनेछ । मलाई माया गर्ने मानिसहरू मनजिक छन् र उनीहरू यस फिल्ममा अटाउनेछन् । फिल्मले मेरो जिन्दगीको उतारचढावलाई देखाउनेछ ।’

एजेन्सी