फिल्मको कथा मुम्बईको धारावीमा रहेको एक चालबाट शुरू हुन्छ । मुराद (रणवीर सिंह) गरीबी र सामाजिक बहिष्कार झेलिरहेको एक युवक हुन् । उनले  ठूलो र्‍यापर बन्ने सपना देखिरहेका छन् । 

मुराद एक उत्साही युवती सैफीना (आलिया भट्ट) सँग प्रेम गर्छन् । मुरादको जिन्दगीमा परिवर्तन आउने घटना तब आउँछ जब उसले एमसी शेर अर्थात् श्रीकान्तलाई कलेजका केटाहरूसँग र्‍याप गरेको देख्छ । मुराद त्यसपछि श्रीकान्तसँग जोडिन्छ र दुवैले टीम बनाएर र्‍याप गर्छन् । मुरादको यस काममा उसका साथी र परिवारले साथ दिन्छ र ऊ ठूलो र्‍यापर बन्छ । 

फिल्ममा एक लाइन छ जसमा एमसी शेर (सिद्धान्त चतुर्वेदी) भन्छ, ‘संसारमा सबै कुरा आरामदायी भए कसले र्‍याप गर्थ्यो र ?’ यो नै फिल्मको जिस्ट हो । 

निर्देशक जोया अख्तरले सामान्य बस्तीमा बस्ने मुरादले गरीबीका बावजूद सपनालाई मर्न नदिएर गली बोय नामक प्रसिद्ध र्‍यापर बनेको कथा प्रस्तुत गरेकी छन् । फिल्ममा मुरादको यात्रा रोचक छ । 

फिल्म भारतवर्षीय दर्शकका लागि फरक किसिमको हुन सक्छ किनकि यस क्षेत्रमा र्‍यापको प्रचलन अत्यधिक छैन । तर तपाईंले र्‍यापसँग आफूलाई रिलेट गर्न सक्नुभएन भने पनि फिल्ममा अभिनेताहरूको कलाकारिता र कथाले तपाईंलाई बाँधेर राख्छ । 

फिल्ममा मुरादको पिता आफताब (विजय राज) सँग विचार मिल्दैन । पिताको भूमिका राम्रो बनाइएको छ । 

फिल्मको पटकथा रीमा कागती र जोयाले लेखेका हुन् । कथा टाइट छ । 

रणवीरले आफ्नो भूमिका निर्वाहका लागि राम्रो कोशिश गरेका छन् । उनी मुरादको भूमिकामा जमेका छन् । 

आलियाको कलाकारिता जहिले पनि उम्दा हुन्छ र यो फिल्ममा उनको भूमिका सानो भए पनि प्रभावित गराउन खालको छ । रणवीर र आलियाको क्युट केमिस्ट्रीले फिल्मका पात्रलाई नयाँ उचाइमा पुर्‍याएका छन् । 

पहिलो फिल्ममा नै सिद्धान्त चतुर्वेदीले लामो समयसम्म टिक्ने लक्षण देखाइसकेका छन् । विजय वर्मा, कल्कि केकला र विजय राज लगायतका कलाकारको भूमिका सानो भए पनि शानदार छ । 

फिल्मको संगीत हिट भइसकेको छ । यो वास्तविक जीवनका र्‍यापर नाइजी र डिभाइनबाट प्रेरित छ । फिल्मको पार्श्व संगीत र भिजुअलहरू उम्दा छन् । 

फिल्ममा देखाइएको र्‍याप ब्याटल गजबले लेखिएको छ । 

फिल्मको एउटै समस्या भनेको यो अलि लामो छ र साढे दुई घन्टासम्म जान्छ । तर चुस्त कथा र फिल्मका संवादहरूले दर्शकलाई बाँधेर राख्छन् । 

तपाईं रणवीर आलियाको प्रशंसक हुनुहुन्छ र उनीहरूको राम्रो अभिनयलाई छुटाउन चाहनुहुँदैन भने फिल्म अवश्य हेर्नुस् । र्‍याप संगीत मन पराउनुहुन्छ भने यो फिल्म तपाईंकै लागि हो ।

नवभारत टाइम्समा प्रकाशित रचित गुप्ताको समीक्षाको अनुवाद