जनकपुरधाम – २ नम्बर प्रदेश सभाको सार्वजनिक लेखा समितिमा सभापतिको लागि नेपाल कम्युनिस्ट पार्टी (नेकपा) ले आधिकारिक रुपमा प्रस्ताव गरेका उम्मेदवार भरत साहले समर्थकको हस्ताक्षर कीर्ते गरेको खुलेको छ ।

सार्वजनिक लेखा समितिका सदस्य तथा नेकपाकै प्रदेश सांसद रामकुमार यादवले आफू भरत साहको समर्थक नरहेको व्यहोरा सहितको लिखितपत्र शुक्रवार प्रदेशसभा सचिवालयमा दर्ता गराएपछि कीर्ते रहश्यको खुलासा भएको हो । 

शुक्रवार नेकपाका संसदीय दलका नेता सत्यनारायण मण्डल, प्रमुख सचेतक सुन्दरबहादुर विश्वकर्मा लगायतको एमाले संसदीय दलका पदाधिकारी समेत प्रदेश सभामा साहको उम्मेदवारी दर्ता मनोनयन गर्न जाँदा नेकपाका सांसद लगनलाल चौधरी प्रस्तावक र रामकुमार यादव समर्थक भई मनोनयनपत्र दाखिला गराइएको थियो । 

सार्वजनिक लेखा समितिमा नेकपाका तर्फबाट ४ जना भरत साह, शत्रुघन महतो, रामकुमार यादव र लगनलाल चौधरी सदस्य छन् । शुक्रवार सांसद द्वय शत्रुघन महतो र रामकुमार यादव प्रदेशसभा परिसरमै आएका थिएनन् ।
यादव अनुपस्थित भएपनि समर्थकको रुपमा उनको हस्ताक्षर सहितको मनोनयन दर्ता भएको भोलिपल्ट यादवले प्रदेशसभा सचिवालयमा शुक्रवार उजुरी दर्ता गराएका छन् । ‘सार्वजनिक लेखा समितिको सभापतिको उम्मेदवार भरतप्रसाद साहको समर्थकमा मेरो सहमति र हस्ताक्षर नरहेको कुरा जानकारी गराउँछु,’ यादवले दर्ता गराएको लिखित पत्रमा उल्लेख छ ।

यादवको निवेदनबारे प्रदेशसभा सचिवालयका उपसचिव रञ्जितकुमार यादवले भने, ‘यदि त्यसको छानबिनको माग सचिवालय समक्ष आयो भने छानबिन पनि हुन सक्छ ।’ प्रदेशसभा सचिवालयमा एउटा छुट्टै अनुगमन समिति पनि रहेको र समितिले छानबिन गर्न पनि सक्ने उनले बताए । ‘माफी मागे माफी पनि दिन सकिने वा सांसद पद पनि निलम्बन हुन सक्छ,’ उनले भने ।

शुक्रवार नेकपाकै अर्को सांसद शत्रुघन महतोको पनि लेखा समितिको सभापतिका लागि उम्मेदवारी दर्ता गराएका थिए । तर उनको प्रस्तावकमा नेपाली कांग्रेसका सांसद नरेश यादव र समर्थकमा संघीय समाजवादी फोरम नेपालका सांसद पारस साहले उम्मेदवारी मनोनयन दर्ता गराएका थिए । उम्मेदवार महतो भने आफैं मनोनयन दाखिला गराउन गएका थिएनन् । प्रस्तावक समेत रहेका नेपाली कांग्रेसका सांसद नरेश यादवले उनले मनोनयन दर्ता गराएका थिए ।

महतोको उम्मेदवारीबारे थाहा पाएपछि नेकपाका अर्को उम्मेदवार भरत साहले महतोको उम्मेदवारी दर्ता गरिएको मनोनयनपत्र च्यातिदिएका थिए । त्यसपछि विवाद समाधानका लागि सभामुख सरोजकुमार यादवको कार्यकक्षमा नेकपा संसदीय दलका नेता सत्यनारायण मण्डल लगायतका सांसद पुग्दा विवाद भएको थियो ।

नेपाली कांग्रेस र फोरमले नेकपामा चलखेल गरेका कारण समस्या भएको मण्डलले ठानेका थिए । शुक्रवार १० बजे दुवै उम्मेदवारबीच निर्वाचन गर्ने कार्यक्रम तय थियो । तर नेकपाका संसदीय दलका नेता मण्डलले महतोका समर्थक पारस साहलाई भेटेर नेकपा संसदीय दलको आधिकारिक निर्णयको माइन्यूट देखाए । ‘मण्डल ज्यू म कहाँ आउनुभयो । गत माघ २६ गते संसदीय दलको बैठकबाट भरत साहलाई आधिकारिक उम्मेदवार बनाउने निर्णय गरिएको थियो, जसमा शत्रुघन महतोजीको पनि हस्ताक्षर थियो,’ फोरमका सांसद साहले लोकान्तरसँग भने, ‘पछि मैले आफ्नो पार्टीको प्रमुख सचेतकसँग समेत सल्लाह गर्दा अरु पार्टीले राजनीतिक निर्णय गरिसकेपछि हामीले किन हस्तक्षेप गर्ने भन्ने कुरा भएपछि मैले आफ्नो समर्थन फिर्ता लिएँ । त्यसपछि दुवै जना उम्मेदवारले आ–आफ्नो उम्मेदवारी फिर्ता लिनुभयो ।’

नेकपामा माथि एकता भएपनि तल एकता हुन नसक्दा विवाद देखिएको छ । संसदीय दलका नेता मण्डल, प्रमुख सचेतक विश्वकर्मा पूर्वएमालेका हुन् र त्यसमा पनि केपी शर्मा ओली पक्षधर । संसदीय समितिको प्राकृतिक स्रोत तथा वातावरण समितिको सभापतिमा नेकपाको तर्फबाट पूर्वमाओवादीका रामचन्द्र मण्डलको एकल उम्मेदवारी परेका कारण उनी बिहीवार नै निर्विरोध निर्वाचित भएका थिए ।

महतो माधव नेपाल पक्षधर पूर्वएमाले नेता हुन् । उनले संसदीय दलको नेतामै दाबी गर्दै आएपनि प्रदेश सभामा कुनै जिम्मेवारी नपाउँदा पार्टीको लाइन विपरीत गएर उम्मेदवारी दिएका थिए । अब नेकपाले आधिकारिक उम्मेदवार तोकेपछि लेखा समितिको निर्वाचन हुने प्रदेशसभा सचिवालयका उपसचिव रञ्जितकुमार यादवले बताए । 

बिहीवार नै अर्थ तथा योजना समितिमा राजपा नेपालका मनिषकुमार सुमन, विकास समितिमा फोरमका शेष अब्दुल कलाम आजाद, महिला बालबालिका तथा सामाजिक न्याय समितिमा राजपा नेपालका जय्नुल राईन, कृषि तथा भुमि ब्यबस्था समितिमा नेपाली कांग्रेसका विरेन्द्रप्रसाद सिंह र प्रदेश मामिला समितिमा फोरमका अशोक यादव निर्विरोध निर्वाचित भएका थिए । 

निर्वाचित सभापतिको शुक्रवार सभामुख सरोज यादवले सपथ गराएका छन् । समितिको सभापति दलीय आधारमा भागबण्डा गरिएको थियो । २ वटा फोरम, २ वटा राजपा, २ वटा नेकपा र एउटा कांग्रेसले पाउने गरी भागबण्डा गरिएको थियो ।