काठमाडौं – धितोपत्र बजारमा यस साता विभिन्न ५ कम्पनीका शेयर सूचीकृत भएका छन् । 

नेपाल स्टक एक्सचेञ्जका अनुसार एनसीसी बैंकको ७९ लाख ११ हजार २ सय ८१ कित्ता हकप्रद शेयर सूचीकृत भएका छन् ।

जानकी फाइनान्स लिमिटेडको ८ लाख ८७ हजार ४ सय ६६ कित्ता शेयर लाभांश, निर्धन उत्थान लघुवित्त वित्तीय संस्थाको २० लाख कित्ता शेयर लाभांश सूचीकृत भएको छ । 

स्टकका अनुसार बेस्टर्न डेभलपमेन्ट बैंकको ७ लाख ४७ हजार ५ सय ६१ कित्ता शेयर लाभांश र मुक्तिनाथ विकास बैंकको ४७ लाख २९ हजार ९६८ कित्ता शेयर लाभांश सूचीकृत भएको छ । साताभर शेयर कारोवार मापन गर्ने नेप्से परिसूचक १४.६५ बिन्दुले घटेको छ । 

यस साता एभरेष्ट बैंकको संस्थापक शेयर सबैभन्दा बढी कारोबार भएको छ । सो बैंकको १ अर्ब ९१ करोड ७६ लाख बराबरको कारोबार भयो । दोस्रोमा माथिल्लो तामाकोशी जलविद्युत् कम्पनीको ६२ लाख रुपैयाँ बराबरको कारोबार भएको छ । 

प्रभु बैंक, सिटिजन इन्भेस्टमेन्ट ट्रस्ट, नेपाल क्रेडिट एण्ड कमर्सियल बैंक, नेपाल लाइफ इन्स्योरेन्स कम्पनी, एनएमबी बैंक, प्रभु बैंक लिमिटेको संस्थापक शेयर, नेपाल बैंक लिमिटेड र माछापुच्छ्रे बैंकको शेयर बढी कारोबार भयो । 

बजार पूँजीकरणमा भने नेपाल टेलिकम नै अग्रस्थानमा रहेको छ । सो संस्थाको १ खर्ब ४ अर्ब २५ करोड रुपैयाँ बराबरको बजार पूँजीकरण रहेको छ । नबिल बैंक, नेपाल इन्भेस्टमेन्ट बैंक, नेपाल लाइफ इन्स्योरेन्स, स्ट्याण्डर्ड चार्टड बैंक, एभरेस्ट बैंक, हिमालयन बैंक, एनआइसि एशिया बैंक, नेपाल एसबीआई बैंक र एनएमबी बैंक रहेका छन् ।