काठमाडौं – सिद्धार्थ क्यापिटल लिमिटेडको निष्काशन तथा बिक्री प्रबन्धकत्वमा शिवम् सिमेन्टस् लिमिटेडकोे प्रतिशेयर १०० अंकित दरमा प्रिमियमवापत २ सय रुपैयाँ थप गरी प्रतिशेयर ३ सय रुपैयाँका दरले ४१ लाख २० हजार कित्ता साधारण शेयर सर्वसाधारणका निमित्त मिति फागुन ६ गतेदेखि बिक्री खुल्ला गरिएको छ । 

आयोजना प्रभावित क्षेत्रका वासिन्दाका लागि प्रिमियमसहित शेयर निष्काशन मूल्य २०० तोकिएको हुँदा यसअघि ३०० रुपैयाँमा ८ लाख ८० हजार कित्ता शेयर निष्काशन गरी २ लाख २ सय ४० कित्ताको मात्र आवेदन परेको र सोलाई बाँडफाँड गरिएकोमा हाल तोकिएको निष्काशन मूल्य बमोजिम बाँडफाँड भएका शेयरधनीलाई १ लाख १ सय २० कित्ता शेयर थप प्रदान गरिने छ ।

बाँकी रहेको ५ लाख ७९ हजार ६ सय ४० कित्ता शेयर २ सय रुपैयाँमा आवेदन गर्न चाहने स्थानीयलाई पुनः थप वा नयाँ आवेदन गर्न सकिने व्यवस्था मिलाइएको हुँदा इच्छुक उद्योग प्रभावित क्षेत्र मकवानपुर जिल्लाका सम्पूर्ण वासिन्दाले समेत निष्काशन खुल्ला अवधिमा तोकिए बमोजिम आवेदन गर्न सक्नेछन् ।

सार्वजनिक निष्काशनमा न्यूनतम ५० कित्ता तथा अधिकतम् सम्पूर्ण कित्ताका लागि नेपाल धितोपत्र बोर्डबाट अनुमति प्राप्त आस्बा सेवामा सहभागी बैंक तथा वित्तीय संस्थाबाट सिआस्बा प्रणालीमार्फत् आवेदन गर्न सकिने छ ।

सार्वजनिक निष्काशनमा एनआईवीएलएस क्यापिटल लिमिटेड, ग्लोबल आईएमई क्यापिटल लिमिटेड र सीबीआईएल क्यापिटल लिमिटेड प्रत्याभूतिकर्ता रहेका छन् ।