दमौली-  नेपाली कांग्रेसका वरिष्ठ नेता रामचन्द्र पौडेलले प्रधानमन्त्री केपी ओली नेतृत्वको सरकार समृद्धिको नभई भ्रष्टचार, बेथिति र विसंगतिको जग बसालेको आरोप लगाएका छन् । 

प्रधानमन्त्री केपी ओलीले आफ्नो एक वर्षे कार्यकाल पूरा भएपछि देशवासीका नाममा सम्बोधन गर्दै  विकास र समृद्धिको जग बसाएको उल्लेख गरेका थिए । तनहुँको व्यास नगरपालिका ११ को बेलटारीमा आयोजित कार्यकर्ता भेटघाट कार्यक्रममा प्रमुख विपक्षी दल कांग्रेस वरिष्ठ नेता पौडेलले ओली सरकारले भ्रष्टचार, बेथिति र विसंगतिको जग बसाएकाले मुलुक समृद्धिको बाटोमा अगाडि बढ्न नसक्ने स्पष्ट पारेका हुन् ।

पौडेलले भने, 'ओलीजीले सरकारले समृद्धिको जग बसाएको भन्नुभएछ । सरकारले बसाएको जगबाट मुलुक समृद्धिको बाटोमा जान सक्दैन । मुलुकमा अहिले समृद्धिको बाटोमा भन्दा पनि भ्रष्टाचार र बेथितिको बाटोमा अघि बढेको छ ।’

वरिष्ठ नेता पौडेलले कांग्रेस निष्ठाको राजनीति गर्ने पार्टी भएको भन्दै सम्पूर्ण नेता कार्यकर्ताहरू निष्ठावान् बन्नुपर्नेमा जोड दिए । उनले कांग्रेसले महासमितिबाट पास भएको विधानले निमुखा कांग्रेस कार्याकर्ता तथा अवसर नपाएका कार्याकर्तामाथि न्याय गर्ने आश्वसन दिए । पौडेलले विगतमा आफू बढि राष्ट्रिय राजनीतिमा केन्द्रीत हुनुपरेका कारण जिल्लामा समय दिन नसकेको स्वीकार गर्दै अब मुलुकको राजनैतिक मुद्दा टुंगो लागेका कारण फुर्सद भएकाले जिल्लामा समय दिने प्रतिबद्धता जनाए ।

पौडेलले भने, 'हिजोका दिनमा बढि राष्ट्रिय राजनीतिमा केन्द्रीत हुनुपर्‍थ्यो । संविधान बनाउन सदनमा बढि व्यस्त भएर आउन सकिनँ  । अब तनहुँलाई समय दिन्छु ।’

पौडेलले लोकतान्त्रिक संविधान निर्माणका लागि आफुहरुले ठूलो लडाईं लड्न परेको उल्लेख गर्दै वीपी कोइराला, सुर्वणशमशेर गणेशमान जी, किसुनजीहरूको २००७ सालदेखिको संविधानसभामार्फत संविधान बनाउने सपना आफूहरूले पूरा गरेको बताए । पौडेलले उनले थपे, 'संविधान बनाउने क्रममा राष्ट्रलाई छिन्नभिन्न बनाउने प्रयास भएको थियो । त्यो कांग्रेसले रोक्यो । संविधान बनेपछि आम चुनाव कांग्रेसले गरायो । संविधानसंग असहमति राख्ने शक्तिलाई संविधानको दायरामा ल्यायौं तर चुनावमा कांग्रेस हार्‍यो ।'