काठमाडौं – प्रमुख सत्तारुढ दल नेकपाले सांगठनिक एकीकरणको खाका तयार गर्न गठित कार्यदलका सदस्यसँग छलफल गरेर प्रतिवेदनलाई अन्तिम रुप दिने निर्णय गरेको छ ।

प्रधानमन्त्री निवास बालुवाटारमा सोमवार बसेको नेकपा सचिवालय बैठकले बिहीवार कार्यदलका सदस्यलाई समेत आमन्त्रण गरेर प्रतिवेदनलाई पूर्णता दिने निर्णय गरेको प्रवक्ता नारायणकाजी श्रेष्ठले जानकारी दिए ।

गृहमन्त्री समेत रहेका सचिवालय सदस्य रामबहादुर थापा नेतृत्वको कार्यदलले एकीकरणको सांगठनिक ढाँचा तयार पार्न सकेको छैन ।

‘प्रतिवेदनमाथि के गर्ने भनेर छलफल गर्ने भन्ने छलफल भयो । ९ गते बस्ने बैठकमा कार्यदलका सदस्यलाई आमन्त्रण गरेर सबै सदस्यलाई छलफल गरेर सांगठनिक संरचनालाई अन्तिम रुप दिने सहमति भएको छ,’ बैठकपछि प्रवक्ता श्रेष्ठले लोकान्तरसँग भने ।

संयोजक बादलले प्रस्तुत गरेको प्रतिवेदन एकतर्फी भएको भन्दै कार्यदलका अन्य सदस्यले आपत्ति जनाएका छन् । ११ वटा विषयमा सहमति गरेर एकीकरण प्रक्रियालाई टुंगो लगाउने जिम्मेवारी पाएको कार्यदलले पार्टीको विधान र प्रादेशिक संरचनाबाहेक अन्य विषयमा छलफलमा प्रवेश नै नगरेको कार्यदल सदस्य बेदुराम भुसालले बताए ।