काठमाडौं– गायक पशुपति शर्माको गीतलाई लिएर प्रतिनिधि सभाको बैठकमा सत्ता र प्रतिपक्षका सांसदहरूबीच घोचपेच चलेको छ ।

सरकारले गीतमा प्रतिबन्ध लगाउन खोजेको भन्दै कांग्रेस सांसद अमरेश कुमार सिंहले फागुन महिनाको तलवबाट २५ हजार रुपैयाँ दिने घोषणा गरेलगत्तै नेकपाका सांसद झपड रावलले व्यङ्ग्य गरेका हुन् । 

‘सुशील कोइरालाकाको पालामा 'मलाई अमेरिका यही' भनेर गीत गाउने गायकले अहिले सरकारलाई यमराज राक्षससँग तुलना गरेको गीतलाई प्रतिपक्षका सांसदले पुरस्कार दिने भनेपछि रहस्य बुझियो,’ सांसद रावलले भने, ‘भगवान् पशुपति नाथले जोगाउन नसकेको कांग्रेसलाई गायक पशुपति शर्माले जोगाउन ।’ साथै सांसद रावलले 'यो गीत संसदमा गाएमा सांसद सिंहलाई एक महिनाको पारिश्रमिक दिने घोषणा गर्छु' भन्दै व्यङ्ग्य गरे ।

यसअघि सरकारले गायक शर्माको गीतमा प्रतिबन्ध लगाउन खोजेको आरोप लगाउँदै कांग्रेस सांसद अमरेश कुमार सिंहले जनताको बोली गीतमार्फत बोलेको भन्दै गायक पशुपति शर्मालाई २५ हजार रुपैयाँ दिने घोषणा गरेका थिए । 

सिंहले गायकको गीतलाई प्रतिबन्ध लगाउने सरकारलाई जनताले पनि सम्मान गर्न नसक्ने उनले बताएका थिए ।

शर्माको 'लुट्न सके लुट' भन्ने गीतले कांग्रेसको पक्षपोषण गरेको आरोप लागिरहेका बेला सोमवारको संसद् बैठक 'पशुपतिमय' बनिरहेको छ । विवाद बढेपछि शर्माले हाललाई युट्युबबाट उक्त गीत हटाएका छन् ।