काठमाडौं – त्रिभुवन विश्वविद्यालयले स्वतन्त्र विद्यार्थी यूनियन (स्ववियू) को निर्वाचन सम्पन्न गर्न केन्द्रीय निर्वाचन समन्वय एवम् निरीक्षण समितिको घोषणा गरेको छ । 

सोमवार स्ववियू निर्वाचनको कार्यतालिका सार्वजनिक गर्न दबाब दिन त्रिभुवन विश्वविद्यालय घेराऊ गर्न पुगेका सत्तारुढ नेकपा निकट अनेरास्ववियू र अनेरास्ववियू क्रान्तिकारीको घेराऊ कार्यक्रलगत्तै समितिको नामावली सार्वजनिक गरिएको छ ।

त्रिभुवन विश्वविद्यालयकी शिक्षाध्यक्ष प्रा.डा. सुधा त्रिपाठीको संयोजकत्वमा ७ सदस्यीय कार्यसमितिको नामावली सार्वजनिक गरिएको हो । समितिको सहसंयोजकमा रजिस्ट्रार डिल्लीराम उप्रेती रहेका छन् । समितिका अन्य सदस्यमा विष्णुप्रसाद खनाल, नरेन्द्रप्रसाद शिवाकोटी, विष्णु केसी, नारायणप्रसाद खनाल र सदस्य सचिवमा गंगाबहादुर थापामगर रहेका छन् ।

केन्द्रीय निर्वाचन समिति बन्नुलाई सकारात्मक रुपमा लिएको अनेरास्ववियू क्रान्तिकारीका उपाध्यक्ष सुरेन्द्र बस्नेतले वताए । समितिको बैठक तत्काल बसेर स्ववियू निर्वाचनको तालिका सार्वजनिक गर्ने त्रिविका रजिस्टार डिल्लीराम उप्रेतीले वताए ।

समितिको नाम सार्वजनिक हुनुअघि आयोजित घेराऊ कार्यक्रममा अनेरास्ववियू क्रान्तिकारीका अध्यक्ष रञ्जित तामाङ र अनेरास्ववियूका उपाध्यक्ष महेश बर्तौलाले स्ववियू निर्वाचन तत्काल अघि बढाउन चेतावनी दिएका थिए ।