काठमाडौं — क्यानडाको न्युफाउन्डल्यान्डमा चोरहरूले एक कम्पनीबाट ३० हजार लिटर पानी चोरेका छन् । 

यो पानीको मूल्य लगभग १३ लाख रुपैयाँ पर्छ । यो साधारण पानी नभई आइसबर्गको शुद्ध पानी हो । भोड्का र सौन्दर्य प्रसाधन बनाउनका लागि यसको प्रयोग गरिन्छ । 

अनुसन्धान गरिरहेको प्रहरीले बताएअनुसार, यो चोरीको योजना मसिनो गरी बनाइएको र धेरै दिन लगाएर चोरी गरिएको देखिन्छ । आइसबर्गको पानी कहाँ राखिएको थियो भनी चोरहरूलाई थाहा रहेछ । 

प्रहरीका अनुसार, चोरीमा कम्पनीकै कुनै मानिसको हात हुन सक्छ किनकि सामान्य मान्छेलाई आइसबर्गको पानी र साधारण पानीको बारेमा कुनै भिन्नता थाहा हुँदैन । 

कम्पनीका सीईओ डेभिड मायर्सले पानीलाई विशेष सुरक्षा दिएर राखिने गरिएको बताए । यो पानीको ट्यांकसम्म पुग्नका लागि अनेकौं ताल्चालाई पासवर्डले खोल्नुपर्ने हुन्छ । 

वर्षमा एकचोटि समुद्रमा तैरिरहेको आइसबर्गलाई फुटाएर पानी निकाल्ने गरिन्छ । जाडोमा आइसबर्ग पूर्णतः ठोस हुन्छ र त्यसलाई तोड्न एकदमै मुश्किल हुन्छ । त्यसैले पानी निकाल्न एकदमै मुश्किल हुन्छ । 

एजेन्सी