काठमाडौं- पशुपति शर्माको 'लुट्न सके लुट' बोलको व्यङ्ग्यात्मक गीतले सामाजिक सञ्जाल मात्र तताएन, संसदमा समेत हङ्गामा मच्चायो ।

उनको गीतको पक्ष र विपक्षमा सांसदहरू देखिए । सोमवारको प्रतिनिधिसभाको बैठकमा बोल्दै नेपाली कांग्रेसका सांसद अमरेशकुमार सिंहले पशुपति शर्माले जनताको गीत गाएकाले आफ्नो फागुन महिनाको पारिश्रमिकबाट सम्मानस्वरुप उनलाई २५ हजार पुरस्कार दिने घोषणा गरे ।

त्यसको केहीबेरमै नेकपाका सांसद झपट रावलले जवाफ फर्काए- सुशील कोइरालाको पालामा 'मलाई अमेरिका यही' भनेर गीत गाउने गायकले अहिले सरकारलाई यमराज राक्षससँग तुलना गरेको गीतलाई प्रतिपक्षका सांसदले पुरस्कार दिने भनेपछि रहस्य बाहिर आएको छ । सरकारले कुनै पनि प्रतिबन्ध लगाएको छैन ।' सांसद रावल त्यतिमै रोकिएनन् । उनले थपे, 'भगवान् पशुपतिनाथले जोगाउन नसकेको कांग्रेसलाई गायक पशुपति शर्माले जोगाउन् ।'

सांसद रावलले पशुपतिको गीतमा राजनीतिक रङ मिसिएको इंकित गरे । तर कांग्रेसलाई लाञ्छना लगाउँदै गर्दा रावलले आफू चिप्लिएको पत्तै पाएनन् ।

पशुपति शर्माको 'अमेरिका यही' बोलको गीत सुशील कोइरालाको पालामा आएको सांसद रावलले संसदमा बताए । तर त्यो सरासर झुट थियो ।

उक्त गीत २०७० कात्तिक २८ गते 'म्युजिक नेपाल'को युट्युब च्यानलबाट अपलोड भएको देखिन्छ । तर सुशील कोइराला २०७० माघ २७ गते प्रधानमन्त्रीमा निर्वाचित भएका थिए । पशुपतिको सो गीत बजारमा आउँदा तत्कालीन मन्त्रिपरिषद्का अध्यक्ष थिए- खिलराज रेग्मी । सुशील कोइराला प्रधानमन्त्री हुँदा उक्त गीतले बजार पिटिसकेको थियो ।  यसबाट संसदमा सांसद रावलले झुट बोलेको स्पष्ट हुन्छ ।