काठमाडौं – प्रज्ञा लालाबाला दोस्रो एकल बाल नाटक महोत्सवमा उत्कृष्ट ५ नाटक छनौट गरी समापन गरिएको छ । 

देशभरबाट करीब ४० वटा जति विद्यालयका ४९ जना कलाकारले सहभागिता जनाएको महोत्सव ३ दिनसम्म चलेको थियो ।

वरिष्ठ रंगकर्मी हरिहर शर्मा र देशभक्त खनाल निर्णायक रहेको एकल बाल नाटक महोत्सवमा निकै राम्रा नाटक आएका थिए । तीमध्ये पनि मुख्य निर्णायक हरिहर शर्माले ५ उत्कृष्ट नाटक घोषणा गरे ।

उत्कृष्टमध्ये रंगकर्मी तथा नाटक निर्देशक घनश्याम गौतमद्वारा निर्देशित लिटिल एन्जल्स स्कूलको ‘मृत्युगोठ’ जीवन बरालद्वारा निर्देशित ‘निनिको क स्ल’ अजित अर्यालको निर्देशन रहेको ‘कमला’ सञ्चिता पराजुली निर्देशन रहेको जुगल ई. स्कूलको ‘बाईबडी’ स्कूल एम्बिसन एकेडेमीको प्रेरणा भट्टराई आफ्नै निर्देशनको मेरी मुसी नाटक उत्कृष्ट छनौट भएका थिए । 

उत्कृष्ट नाटकका कलाकारले नगद ४ हजार रुपैयाँसहित ट्रफी र प्रमाणपत्र प्राप्त गरेका थिए । पुरस्कार वितरण कार्यक्रममा सम्पूर्ण विद्यालयलाई मायाको चिनो प्रदान गरिएको थियो । यसै वर्षदेखि नियमित विद्यालयमा थियटर पढाउने थियटर निर्देशकलाई थियटर एजुकेसन २०७५ द्वारा सम्मानित गरिएको छ । 

सम्मानित हुनेमा रंगकर्मीहरू प्रकेश सिन्धुलीय, जीवन बराल, घनश्याम गौतम, प्रल्हाद खरेल, प्रभाकर न्यौपाने, अजित अर्याल, सन्जिता पराजुली, पुष्पराज अवस्थी, विजय कार्की, प्रकाश दाहाल, देव जोशी, सुरेन्द्र क्षेत्री, परिक्षित विक्रम राना, सुरज तामु र सागर कान्छो रहेका छन् । 

महोत्सवमा उत्कृष्ट हुने क्रिएटीभ विद्यालयकी विदिशा महर्जन, लिटिल एन्जल्स स्कूलकी आयुष्मा पौडेल, एम्बिसन एकेडेमीकी प्रेरणा भट्टराई, जुगल ई. स्कूलकी स्मेरा बिष्ट र पायोनियर पब्लिक स्कूलकी दिपिका ढुंगानालाई श्रीलंकामा अन्तर्राष्ट्रिय नाटक महोत्सवमा सहभागी गराइने छ । 

आगामी दिनमा सहभागिता अझैं बढाएर व्यवस्थित ढंगले महोत्सव गरिने महोत्सव निर्देशक टंक चौलागाईले बताए । महोत्सव फागुन १, २ र ३ गते गरी ३ दिन शिल्पी थियटरमा सञ्चालन भएको थियो ।