काठमाडौं– टीट्वेन्टी र एकदिवसीय विश्वकप दुवैको छनोट प्रतियोगिताको रुपमा रहेको अन्तर्राष्ट्रिय क्रिकेट काउन्सिल (आईसीसी) वुमन्स क्वालिफायर एसियाअन्तर्गत आफ्नो पहिलो खेलमा नेपालले मंगलबार मलेसियाको सामना गर्दै छ । खेल नेपाली समय अनुसार बिहान पौने ९ बजे थाइल्याण्डको राजधानी बैंककस्थित टर्ड थाइ क्रिकेट मैदानमा हुने छ । 

नेपालका लागि विश्वकपसम्म पुग्ने यो पहिलो खुड्किलो हो । गत महिना थाइल्याण्डमै भएको वुमन्स टी ट्वान्टी स्म्यास प्रतियोगितामा नेपालले मलेसियालाई ६ विकेटले पराजित गरेको थियो । राउण्ड रोबिनको आधारमा हुने छनोटको बिजेताले आईसीसी महिला टी–ट्वान्टी विश्वकपको ग्लोबल छनोटमा पुग्नेछ ।

नेपालले युएईसंग फेब्रुअरी २२ मा खेल्नेछ । त्यस्तै हङकङसंग २४ फेब्रुअरीमा, चीनसंग फेब्रुअरी २५ मा र अन्तिम खेलमा कुवेतसंग फेब्रुअरी २७ मा खेल्नेछ ।