लियोनेल मेस्सीले आइतवार रियाल बेटिसविरुद्ध उसकै मैदान बेनिटो भियामारिनमा आफ्नो दृढ उपस्थिति देखाए अनि उनको तेस्रो गोल त अलौकिक नै थियो । 

यी अर्जेन्टिनी खेलाडी ला लिगाका सर्वाधिक गोलकर्ता हुन्, संसारकै सर्वोत्कृष्ट खेलाडी हुन् र फूटबल इतिहासकै महानतम खेलाडी हुन् । उनले रियाल बेटिसविरुद्ध बार्सिलोनालाई ४–१ को जीत दिलाउनका लागि ह्याटट्रिक गरे । 

मेस्सीका गोलहरूले बार्सिलोनालाई दोस्रो स्थानमा रहेको एट्लेटिको मड्रिडभन्दा १० अंकको स्पष्ट अग्रताका साथ शीर्ष स्थानमा कायम राखेको छ । लिगा उपाधि जित्नका लागि बार्सिलोनाको यो निर्णायक जीत हो । 
मेस्सी विश्वका आठौं आश्चर्य हुन् र यस खेलको जीतमा उनको योगदान अत्यन्तै महत्त्वपूर्ण र उल्लेख्य रह्यो ।

उनको अद्भुत खेल देखेर विपक्षी टीम रियाल बेटिसका समर्थक समेत मन्त्रमुग्ध भए र उनीहरूले उठेर ताली बजाउँदै मेस्सीप्रति सम्मान दर्शाए । आफ्नो टीमको लज्जास्पद हार भए पनि उनीहरू त्यसलाई भुलाउँदै मेस्सीको सम्मान गर्न उठे । 

विपक्षी टीमका समर्थकले उठेर ताली बजाएपछि मेस्सीले भने, ‘मैले यस्तो रातको कल्पना नै गरेको थिइनँ । म प्रशंसकहरूको सम्मानप्रति कृतज्ञ छु । मैले प्रहार गरेका शटहरू सौभाग्यवश गोलमा परिणत भए र हामीले तीन अंक पायौं ।’

📍 Benito Villamarín
👏👏👏 Tremendous gesture from the @RealBetis fans as they recognise that the Leo #Messi magic is something for everyone to enjoy. Bravo!
👍 #FairPlay pic.twitter.com/IiZUmSPhjb

— FC Barcelona (@FCBarcelona) March 17, 2019

मेस्सीले लिगामा ३३औं ह्याटट्रिक गरेका हुन् ।

बार्सिलोनाका यी कप्तान असाध्यै विनम्र छन् र कमै बोल्छन् तर उनको जादूयी खेलले नै सबै कुरा बोल्यो ।

यस खेलमा बार्सिलोनाले जम्मा ४३.९ प्रतिशत पोजेजन पायो । सन् २००४–०५ को सीजनयता लिगाको खेलमा यो सबभन्दा कम पोजेजन हो । तर कम पोजेजनले कुनै असर पारेन किनकि प्रशिक्षक अर्नेस्टो भाल्भेर्देको रणनीतिले काम गर्‍यो टीमका सबभन्दा प्रतिभाशाली खेलाडी मेस्सी पनि सफल रहे । 

भाल्भेर्देले नयाँ फर्मेसन बनाए अनि लाइनअप पनि परिवर्तन गरे । फिलिप्पे कउटिन्होको स्थानमा आर्टुरो भिडाललाई ल्याइयो र बार्सिलोनाले ४–३–३ को साटो ४–४–२ को डायमन्ड मिडफील्ड बनायो । 

कउटिन्होले च्याम्पियन्स लीगको खेलमा लियोनविरुद्ध सुधारिएको खेल देखाएको भए पनि भाल्भेर्देले रियाल बेटिससँगको महत्त्वपूर्ण खेलका लागि उनलाई पत्याएनन् । भाल्भेर्दे सही साबित भए ।

मिडफील्डमा डायमन्ड फर्मेसन बनाइँदा बार्सिलोनालाई बेटिससँग मिडफील्डमा भिडन्त गर्न सहज भयो । मिडफील्डमा यदाकदा बार्सिलोनालाई अप्ठ्यारो परे पनि चारजना प्रमुख खेलाडी त्यहाँ हुँदा बेटिसलाई लय पक्रिन गाह्रो भयो। 

दुई स्ट्राइकर मेस्सी र सुआरेजका पछाडि बसेर भिडालले विपक्षी खेलाडीहरूलाई अत्याइरहे र भाल्भेर्देले उनलाई त्यसै गर्न भनेका थिए । 

चिलीका खेलाडी भिडालले फ्रीकिक पाएपछि त्यसलाई मेस्सीले गोलमा परिणत गर्दै बार्सिलोनालाई १८औं मिनेटमा पहिलो सफलता दिलाए । उनले मास्तिर देब्रे कुना च्यापेर बल छिराउँदा बेटिसका गोलकीपर पाउ लोपेजले रोक्ने मौकै पाएनन् । 

लोपेजले इस्पान्योलमा छँदा मेस्सीसँग अप्रिय व्यवहार गरेर उनलाई कुल्चेका थिए अनि मेस्सीले फ्रीकिकमार्फत गोल गरेर त्यसको राम्रै बदला लिए । 

बेटिसले बार्सिलोनालाई समास्यामा पारे पनि बार्सिलोनाले लगातार प्रेस गर्दै बेटिसलाई पनि असहज स्थितिमा राख्यो । यो खेल रोमाञ्चक र दर्शनीय रह्यो । 

मेस्सीले दोस्रो गोल पहिलो हाफ सकिने बेलामा गरे । सुआरेजले कुुर्कुच्चा पछाडिबाट गरेको प्रहारलाई उनले गोलमा परिणत गरेका हुन् । 

सुआरेजको बुद्धिमत्तापूर्ण खेल यस क्रममा देखियो । उनले पहिलो हाफमा आफैं गोल गर्ने एक अवसर गुमाए । मेस्सीले उनका लागि राम्रो पास मिलाएको भए पनि उनले देब्रे गोडाले हानेको शट कमजोर रह्यो र लोपेजले बल रोके । 

दोस्रो हाफमा सुआरेजले कीपरलाई छक्याउन त सफल भए तर उनको क्रस शट टार्गेटबाट टाढा रह्यो अनि त्यसलाई फेरि गोलमा परिणत गर्न उनले गरेको प्रहार गोलपोस्टबाट परै पुग्यो । 

यो गोल मिस गर्न हुँदैनथियो र मैदानमा उपस्थित बार्सिलोना समर्थकहरू अलिक निराश भए । सुआरेजले सजिला अवसर गुमाउने अनि गाह्रो गोल गर्ने काम आजकल गरिरहेका छन् । 

तर त्यसको केही क्षणमा नै उनले खेलमा सुधार ल्याउँदै बेटिसको डिफेन्सलाई छलाउँदै बल अघि बढाए । यस क्रममा बेटिसका सेन्टर ब्याक डिफेन्डर मार्क बार्त्रा भुइँमै पछारिए । जमीनले निले हुन्थ्यो भनी उनले सोचे होलान् । अनि सुआरेजले मीठो गोल गरे । 

बार्साका लागि ला लिगामा उनको यो १२८औं गोल थियो र उनले लालिगामा उरुग्वेली खेलाडीको कीर्तिमान बराबरी गरे । एट्लेटिको मड्रिडका पूर्व स्ट्राइकर डीएगो फोर्लानको गोलसंख्या सुआरेजले बराबरी गरेका हुन् । 

सुआरेजले ला लिगाको यस सीजनमा १८ गोल गरेका छन् र उनीभन्दा मेस्सी मात्र अगाडि छन् । 

मेस्सीले ला लिगामा यस सीजनमा २९ गोल गरिसकेका छन् र उनले दोस्रो हाफमा पनि प्रभावशाली प्रदर्शन गरे । बेटिसका समर्थकहरूले फूटबल इतिहासकै सर्वोत्कृष्ट खेलाडीको अद्भुत खेल हेर्ने मौका पाए । 

उनले गरेको तेस्रो गोलपछि बेटिसका समर्थकहरूले आफ्नो भावना रोक्नै सकेनन् र उठेर उनलाई अभिवादन गरे । त्यसो त मेस्सीले खेल सकिने बेलामा पनि एउटा प्रहार गरेका हुन् तर अलिकतिले गर्दा उनको चौथो प्रहार असफल रह्यो । 

लीगमा जम्मा १० खेल बाँकी रहँदा बार्सिलोनाले उपाधि जित्नै लागेको छ । अबका केही दिनमा उपाधि बार्सिलोनाकै नाममा हुनेछ तर मेस्सीका अद्भुत प्रदर्शनका यादहरू स्पेनका विभिन्न स्टेडियमहरूमा सदासर्वदाका लागि कायम रहनेछन् ।

गोल डट्कममा प्रकाशित रिक शर्माको रिपोर्ट