सुर्खेत-कर्णाली प्रदेश सभाको हिउँदे अधिवेशनको पाँचौं वैठकमा पहिलो पटक 'ढ्याढ्यापे' चलनको शुरूवाट भएको छ । बैठक सुचारु भए लगत्तै नेपाली काँग्रेसका संसदीय दलका नेता जीवनबहादुर शाहीले टेबुलमा 'ढ्यापढ्याप' गरेपश्चात सभामुख राजबहादुर शाहीले उनलाई कुरा राख्न अनुमति दिएका थिए ।

नेता शाहीले प्रदेश सरकारले विप्लव समुहलाई प्रतिबन्ध होइन, वार्ता गर्न संघ सरकारलाई घच्घच्याउनुपर्ने बताए । ‘अहिलेसम्म जति पनि नेपालमा द्वन्द्व भएका छन्, ती सबैमा वार्ताकै माध्यमबाट निकास निकालिएको ईतिहास साक्षी छ,' उनले भने, ‘प्रदेश सरकारले संघीय सरकारलाई वार्ताबाटै निकास निकाल्न सहकार्य गरोस ।’

शाहीले अहिले जनताले रक्तपातपुर्ण वातावरण नचाहेको बताउँदै 'सुखी नेपाली समृद्ध नेपाल' अभियानलाई सफल बनाउन सबैसँग लोकतान्त्रिक विधिबाट वार्ता र संवादको थालनी गर्नुपर्नेमा जोड दिए । उनले विप्लव समु्हले कर्णालीका जनप्रतिनिधिहरुमाथि चन्दा आतंक थोपरेको आरोप लगाए ।

उनले सरकार अहिलेपनि सुतिरहेको बताउँदै सदनमा एक जना मात्र मन्त्री आउनु संसदको मर्यादामाथिको आक्रमणको रुपमा अर्थ्याए । आजको संसद वैठकमा प्रदेश सरकारको सामाजिक विकास मन्त्रालयले टेबल गरेको कर्णालीको खेलकुद सम्बन्धी व्यवस्था गर्न बनेको विधेयकमा तीन जना संसदले सैद्धान्तिक छलफलमा भाग लिए ।

नेकपाका विन्दमान विष्ट र ठम्मर विष्ट तथा नेपाली काँग्रेसका यज्ञ बहादुर बिसीले विधेयकमा केहि थप सुधार गर्नुपर्ने माग गरे । त्यसपछि संसदहरुले सदनमा उठाएका मागहरुको उचित सम्वोधन गरिने मन्त्री दल रावलले आश्वासन दिए । संसदको अर्को वैठक चैत ५ गते मंगलबार दिउसो १ बजे बस्नेछ ।