काठमाडौं– विमान सेवा प्रदायक बुद्ध एयरले आफ्नो १२ औं जहाज एटीआर ७२–५०० भित्र्याएको छ । फ्रान्सको टुलुजस्थित एटीआर कम्पनीद्वारा निर्मित जहाज बुद्ध एयरले भित्र्याएको हो ।

नाइन एन एएमवाई कलसाइन रहेको जहाज सोमवार त्रिभुवन अन्तर्राष्ट्रिय विमानस्थलमा अवतरण गरिएको हो । कम्पनीसँग थपिएको जहाजसहित ७ वटा एटीआर ७२–५००, तीनवटा एटीआर ४२–३२० र दुई वटा बीच क्राफ्ट १९०० डी रहेका छन् ।

नयाँ जहाजको रंगरोगन तथा प्राविधिक कार्यपश्चात अर्को महिनाबाट उडान भर्नेछ । थपिएको जहाजले नियमित मर्मत सम्भार तथा उडान वृद्धि गर्न सहयोग पुर्‍याउने विमान कम्पनीले जानकारी दिएको छ । 
 
बुद्ध एयर आगामी आगामी जेठ १३ बाट एटीआर ७२–५०० बाट भारतको कोलकाता पनि उडान भर्नेछ । भारतीय तथा नेपाली यात्रुको लागि हवाई टिकटसहित विभिन्न धार्मिक तथा पर्यटकीय प्याकेजको पनि व्यवस्था गरेको छ ।