काठमाडौं – स्वस्थ रहन सरसफाइ गर्नुपर्छ भनेर सर्वसाधारणलाई सिकाउने स्वास्थ्य मन्त्रालयमा सरसफाइको अवस्था कस्तो होला ? यो प्रश्नको जवाफ सन्तोषजनक छैन ।

संघीय सरकार अन्तर्गत २३ मन्त्रालय छन् । आमजनताको स्वास्थ्यजस्तो संवेदनशील विषयसँग जोडिएको स्वास्थ्य तथा जनसंख्या मन्त्रालय परिसर सबैभन्दा फोहोरी मन्त्रालयको रुपमा देखिएको छ । 

स्वास्थ्य तथा जनसंख्या मन्त्रालय सिंहदरबार परिसरबाहिर रामशाहपथमा छ । मन्त्रालयको बाहिरी परिसरमा गेटको दायाँ भागमा पर्खालको आडमा नै काम नलाग्ने वस्तु र फोहोरो थुप्रिएको छ ।

मन्त्रालयको भवनभित्र ‘कोरिडोर’ र भर्‍याङमा राखिएका गमलामा फूलहरू राखिएका छन् । गमलामा फूलहरू त छन्, ती गमला पान खाएर प्याच्च–प्याच्च थुक्ने भाँडो भएका छन् । गमलाका फूल सुकेका छन् । भर्‍याङ मुनिको खाली ठाउँ पान खाएर थुक्ने ठाउँमा परिणत भएको छ ।

मन्त्रालयका शौचालयहरू समेत फोहोर छन् । पिसाब भुइँभरि छताछुल्ल छ । मन्त्रालयको दोस्रो भवनको शौचालयको वरिपरि बस्न नसकिने गरी दुर्गन्ध आइरहेको हुन्छ । शौचालयसँग कार्यकक्ष जोडिएका छन् । हातधुने बेसन फोहोर वस्तु फाल्ने डस्टबिनजस्तो बनाइएको छ ।

आमजनताको स्वास्थ्यसँग सरोकार राखेर काम गर्ने देशकै केन्द्रिय निकायको बेथितिले मन्त्रालय आमजनताको स्वास्थ्यप्रति कति संवेदनशील होला भनेर प्रश्न जन्मिएको छ ।

सरसफाइको भद्रगोल अवस्थाबारे प्रतिक्रिया लिन मन्त्रालयका प्रवक्ता महेन्द्रप्रसाद श्रेष्ठलाई सम्पर्क गर्न खोज्दा सम्पर्क हुन सकेन ।