काठमाडौं– भौतिक पूर्वाधार तथा यातायात मन्त्री रघुवीर महासेठले टुटल र पठाओका सम्बन्धमा अनुसन्धान भइरहेको बताएका छन् ।

मन्त्रालयको जिम्मेवारी सम्हालेपछिको एक वर्षको उपलब्धि सार्वजनिक गर्न आयोजित पत्रकार सम्मेलनमा महासेठले यस्तो बताएका हुन् । यसअघि पनि टुटल र पठाओका सम्बन्धमा विभिन्न सञ्चार माध्यममा समाचार आएपछि छानबिनका लागि आफूले यातायात व्यवस्था विभागलाई निर्देशन दिएको र अझै पनि त्यो छानबिनकै क्रममा रहेको मन्त्री महासेठले बताए । ‘मैले यसअघि पनि निर्देशन दिएको थिएँ,’ उनले पत्रकार सम्मेलनका क्रममा भने, ‘हामी छानबिनमा लागेका छौं ।’

छानबिनमा क्रममा टुटल र पठाओले कानूनअनुसार चललेको नपाइएमा आवश्यक कारवाही अघि बढाइने मन्त्री महासेठको भनाइ थियो । ‘रातो नम्बर प्लेटको सवारी साधनले यात्रु बोक्न पाउँदैन’ उनले भने, ‘नेपाल सरकारलाई जानकारी नगराइकनै चलाइएको भए, त्यो गैह्र कानुनी हो र छानविन गरी आवश्यक कारवाही अघि बढाउँछौं, ।’

यसअघि टुटल र पठाओले सेवा दिने भन्दै यात्रुबाट रकम असुलेर दुई पाङ्ग्रे सवारीमा यात्रु ओसारपसार गर्दै आएका छन् । दुई पाङ्ग्रे सवारीले यात्रुबाट पैसा असुल्ने र यात्रुसमेत सुरक्षित हुने नगरेका गुनासो पटक-पटक सुनिँदै आएका छन् ।