काठमाडौं– संवैधनिक परिषद्ले निर्वाचन आयोगको रिक्त प्रमुख आयुक्त पदमा दिनेशकुमार थपलियालाई सिफारिश गरेको छ ।

प्रधानमन्त्री तथा मन्त्रिपरिषद्को कार्यालय सिंहदरवारमा सोमवार बसेको परिषद् बैठकले थपलियालाई प्रमुख आयुक्त सिफारिश गरेको राष्ट्रिय सभाका अध्यक्ष गणेश तिमल्सिनाले जानकारी दिए ।  

डा. अयोधि प्रसाद यादवले आइतवार अवकाश पाएपछि आयोग प्रमुख आयुक्तविहीन बनेको थियो । संसदीय सुनुवाइपछि थपलिया प्रमुख निर्वाचन आयुक्त नियुक्त हुनेछन् । थपलिया हाल संघीय मामिला तथा स्थानीय विकास मन्त्रालयको सचिव छन् । 

निर्भिक छवी बनाएका सचिव थपलियाले अर्को महिना अवकाश पाउँदै थिए । सचिव थपलियाको नेतृत्वमा कर्मचारी समायोजनको काम सम्पन्न हुन लागेको छ । थपलिया स्थानीय सरकार र संघीयताबारे जानकार मानिन्छन् । 

प्रधानमन्त्री केपी शर्मा ओलीको अध्यक्षतामा बसेको बैठकमा प्रधानन्यायाधीश, सभामुख र राष्ट्रिय सभाका अध्यक्षसमेत सहभागी थिए । परिषद्का सदस्यसमेत रहेका प्रमुख प्रतिपक्षी दल नेपाली कांग्रेसका सभापति शेरबहादुर देउवा भने लिखित जानकारी गराएर अनुपस्थित रहेका थिए । 

संसदीय सुनुवाइ समितिबाट अनुमोदन भएर प्रमुख निर्वाचन आयुक्त बनेमा थपलियाले स्थानीय, प्रदेश र संघीय तीनवटै चुनाव गर्ने अवसर पाउनेछन् । प्रमुख निर्वाचन आयुक्तको कार्यकाल ६ वर्ष हुने संवैधानिक व्यवस्था छ ।