सार्वजनिक जग्गा मिचेर बनाइएको घर पोखरा महानगरले भत्कायो

चैत ११, २०७५

पोखरा- पोखरा महानगरपालिकाले मापदण्ड विपरित बनेको भौतिक संरचनामा डोजर लगाएर भत्काएको छ । मापदण्ड विपरित बनाएका भौतिक संरचना हटाउन पटकपटक पोखरा महानगरपालिकाले गरेको आग्रहलाई अटेर गरेपछि सोमवार धारापानी मार्गमा रहेको यूवराज खतिवडाको घर भत्काईएको हो ।

खतिवडाले सार्वजनिक जग्गा मिचेर घर बनाएकोले भत्काउन बाध्य भएको पोखरा महानगरपालिकाका प्रवक्ता एवं वडानम्वर ५ का वडाअध्यक्ष धनबहादुर नेपालीले बताए ।


ADVERTISEMENT

महानगरले दिउँसो मापदण्ड विपरित निर्माण गरिएको संरचना भत्काउन डोजरसहित धारापानी मार्गमा पुग्दा शुरूमा स्थानीयले अवरोध गरेका थिए । स्थानीयको अवरोधपछि जिल्ला प्रहरी कार्यालयबाट एक हुल प्रहरी पुगेर सुरक्षा दिएपछि महानगरले मापदण्ड विपरित बनेको घर भत्काएको थियो ।

घर भत्काउन डोजरसहित पुगेका वडाध्यक्ष धनबहादुर नेपालीले सामाजिक अभियन्ता रामबहादुर पौडेलसमक्ष स्थानीयले आक्रोश पोखेका थिए । नगर र जनपद प्रहरीसहित पुगे पनि स्थानीयको अवरोधका कारण थप प्रहरी झिकाएपछि संरचना भत्काइएको थियो ।

घर भत्काउने क्रममा स्थिति नियन्त्रणमा लिन प्रहरीले घरधनी खतिवडा र केही स्थानीयलाई नियन्त्रणमा लिएको छ । संरचनामा डोजर चलाइरहँदा स्थानीयले वडा सदस्य मन्जु केसीमाथि हातपात गरेका छन् ।

सार्वजनिक जग्गामा रहेका स्थानीयहरूले उक्त विवाद उच्च अदालत पुगेको र आगामी १३ गते पेशी रहेकाले त्यतिञ्जेलसम्म पर्खन आग्रह गरेका थिए ।

वडाध्यक्ष नेपालीले पटक–पटक भएको वार्तामा खतिवडाले आफै भत्काउने सहमति गरेपनि अटेर गरेका कारण डोजर चलाउन बाध्य भएको बताए । 'पटकपटकको आग्रहलाई अटेरी गरेपछि भत्काउनुको विकल्प थिएन,' उनले भने, ‘मिचाहा प्रवृत्ति विरुद्ध महानगरले कारवाही गरेरै छाड्छ । सार्वजनिक सम्पत्ति हडप्ने कसैलाई छाड्दैनौं ।'

कानून सबैलाई समान भएकोले पहुँचका भरमा कसैले पनि सार्वजनिक सम्पत्ति दुरुपयोग गर्न नपाउने उनको भनाई छ । घरधनी खतिवडा चाहिं आफूले किनेको जग्गामा घर बनाएको भन्दै रीसिवीका कारण महानगर आफूमाथि खनिएको गुनासो गरेका छन् ।

महिना दिन अघि खतिवडाको छेउनेरै रहेको संरचनामा डोजर लगाउँदा उनले त्यसपटक पनि आफै भत्काउने आश्वासन दिएका थिए । धारापानीको ढुंगेखोला क्षेत्रदेखि तल करीब १ सय २७ घर सार्वजनिक जग्गामा बनेका छन् ।

चैत ११, २०७५ मा प्रकाशित

नरहरि पौड्याल

पौड्याल लोकान्तरका लागि गण्डकी प्रदेशका प्रतिनिधि हुन् ।

लेखकबाट थप...

प्रतिक्रिया दिनुहोस