काठमाडौं – भारतको पञ्जाब राज्यका स्थानीय निकाय मन्त्री नवजोत सिंह सिद्धूले बिहारमा कांग्रेसी उम्मेदवारको समर्थनमा प्रचार गर्दै विवादास्पद बयान दिएका छन् । 

उनले सबै मुसलमान मतदाता एकजुट भएर मोदीविरुद्ध मत दिनुपर्ने बताए । बिहारको कटिहारमा कांग्रेस उम्मेदवार तारिक अनवरका लागि प्रचार गर्ने क्रममा उनले यसो भनेका हुन् । 

सिद्धूले भने, ‘मुसलमानहरू अल्पसंख्यक भए पनि बहुसंख्यक छन् । सबै मुसलमानले छक्का हानेर मोदीलाई मैदान कटाऊन् । मुसलमानहरू एकजुट भएर महागठबन्धनका उम्मेदवारलाई भोट दिऊन् ।’

देशलाई विभाजित गर्ने षड्यन्त्र भइरहेको सिद्धूको भनाइ छ । यसरी देशवासीलाई विभाजित गर्नेलाई चेतावनी दिन आफू आएको उनले बताए । 

उनले भने, ‘तपाईं पञ्जाबमा काम गर्न आउनुभएमा तपाईंलाई इज्जत दिइनेछ । म पञ्जाबमा मन्त्री छु । तपाईंलाई कुनै समस्या भएमा म तपाईंलाई साथ दिन्छु ।’

एजेन्सी