काठमाडौँ - नेपाली कांग्रेसले वैशाख ११ गतेदेखि पार्टी संगठन सुधारका लागि राष्ट्रिय जागरण अभियान चलाउने भएको छ । सरकारका गलत कामकारबाहीलाई आम जनतामाझ लैजानका लागि राष्ट्रिय जागरण अभियान चलाउने निर्णय गरिएको नेताहरूले बताएका छन् ।

कांग्रेसका सहमहामन्त्री प्रकाश शरण महतले पार्टीका नीति, सिद्धान्त, कांग्रेस नेतृत्वमा रहेका बेला भएका उपलब्धिलाई समेत आम जनताको घरदैलोमा पुर्‍याउने लक्ष्यका साथ कांग्रेसले देशव्यापी जागरण अभियान चलाउन लागेको बताए । जागरण अभियानमा कांग्रेसको महासमिति बैठकले पारित गरेका पार्टीका अन्य दस्तावेज पनि पार्टी कार्यकर्तामाझ लैजाने उनको भनाइ थियो ।

वैशाख ११ गतेबाट शुरू हुने जागरण अभियान अन्तर्गत पहिलो चरणमा ७७ वटै जिल्लाहरूमा विविध कार्यक्रमहरू गरिनेछ । पहिलो चरणको कार्यक्रम एक महिनासम्म चल्ने र त्यसपछि भदौ २३ गतेदेखि दोस्रो चरणको कार्यक्रम शुरू हुनेछ । अभियान पुस १४ गतेसम्म चल्ने पार्टी कार्यालयले जानकारी दियो ।