सुर्खेत- प्रधानमन्त्री केपी शर्मा ओलीले भेरी बबई डाइभर्सन जस्ता आयोजनाहरू अझ धेरै बनाउने संकल्प गरेका छन् । मंगलवार भेरी बबई डाइभर्सन आयोजना 'ब्रेक थ्रु' कार्यक्रमलाई सम्बोधन गर्दै यो आयोजना मेसिनको प्रयोगले सम्भव भएको भन्दै यस्ता आयोजना धेरै बनाउने उद्घोष गरेका हुन् ।

‘मेसिनको प्रविधिबाट सम्भव भएको हो,' ओलीले भने, 'यस्ता आयोजना अब हामी नेपालमा धेरै बनाउँछौं ।’ प्रधानमन्त्री ओलीले उक्त डाइभर्सन आयोजनाको स्वीच थिचेर 'ब्रेक थ्रु' गरे । बहुचर्चित उक्त आयोजनाको प्रधानमन्त्री ओलीले मंगलवार टिबीएम मेसिनलाई भेरीगंगा नपा ५ चिप्लेमा बाहिर निकाल्न स्वीच थिचेका थिए ।

तीन वर्षमा सुरुङ निर्माण सक्ने भनेर ठेक्का पाएको चिनियाँ कम्पनीले एक वर्ष अगावै निर्माण कार्य सक्नुले नेपाली जनतालाई, सरकारलाई उत्साहित बनाएको प्रधानमन्त्री केपी शर्मा ओलीको भनाइ थियो ।

‘गर्मी मौसम चर्को छ तर खुशीको क्षणमा छौं,' ओलीले भने, 'एउटा पहिलो प्रयोगले सफलता पाएको छ । जोखिमयुक्त, चुरे श्रंखलामा सुरुङ बनाउन सजिलो कुरा थिएन ।’

कर्णाली प्रदेश सरकारले बिजुली देउ भनेर भन्ने गरेको भनाई प्रति कटाक्ष गर्दै प्रधानमन्त्री ओलीले पानी नेपालकै खेतमा लाग्ने बताए । ‘नेपालकै खेतमा हो पानी लाग्ने । चित्त सानो नबनाउनुस्,’ उनले भने, ‘उतीबेला मैले बाँके बर्दिया कर्णालीमा मिलाउँ भनेको हुँ तर मेरो पुत्ला जलाइयो ।’

विकासमा तीव्रता चाहन्छौं

प्रधानमन्त्री ओलीले देश विकासमा तीव्रता चाहेको बताए । उनले भने ‘नेपाल राजनीतिक रुपमा संक्रमणकालमा थियो । अब हामी विकास निर्माणमा, समृद्धिमा अघि बढन चाहन्छौं । अहिले हामी रुपान्तरण गर्न, विकास गर्न अघि बढिरहन चाहन्छौं ।’

प्रधानमन्त्री ओलीले अन्तर्राष्ट्रिय समुदायसँग सहकार्य गर्दै विकास र समृद्धिको यात्रामा अघि बढ्ने प्रतिबद्धता जनाउँदै लगानी बढाई विकासमा हातेमालो गर्न अमेरीका तथा चीनियाँ राजदुतलाई आग्रह गरे । ‘हामी तपाईहरुसँग सहकार्य गर्न चाहन्छौं,' उनले भने, 'हामी प्रविधिमा सर्पोट चाहन्छौं । विदेशी लगानी चाहन्छौं ।’

भर्ना अभियानमा साथ दिन आग्रह

प्रधानमन्त्री ओलीले विद्यार्थी भर्ना अभियानमा साथ दिन सबैलाई आव्हान गरे । ‘गत वर्षको बैशाख एक गते रारामा आएर हात समाएर भर्ना भएकी छोरी प्रथम भइछन्,' ओलीले भने, ' नेपाली दाजुभाइलाई निरक्षर र अनपढ रहन दिन सकिदैन । आवश्यकताको आधारमा सहयोग गर्न सरकार तयार छ । जनप्रतिनिधि, राष्ट्रसेवक, नेता कार्यकर्ता सबैको साझा कर्तव्य हो । एक बालबालिका पनि विद्यालय बाहिर रहन नपाओस् । त्यस अभियानमा हामी लागौं ।’

बाढीपीडितलाई छानामुनि ल्याइने

प्रधानमन्त्री ओलीले २०७१ मा बाढीले सुर्खेतमा विपत पारेको बताए । ‘२०७१ सालमा बाढीले सुर्खेतमा ठूलो क्षति गरायो । अहिले पनि १०४५ घर पालमै बसेका छन,’ उनले भने, ‘म २०७२ मा प्रधानमनत्री भएँ नौ महिनाका लागि तर ६ महिना नाकाबन्दी मै बित्यो ।’

तर असार भन्दा पहिले नै बाढीपीडितलाई छानामुनि ल्याउन प्रदेश सरकारको ४० प्रतिशत र संघीय सरकारको ६० प्रतिशत बजेट लगानी गरिने प्रधानमन्त्री ओलीले बताए ।

उनले भेरी बबई डाइभर्सनको अब पावर हाउस बनाउने र अन्य कामहरु तत्काल सम्पन्न गर्ने गरी अघि बढाउन विभागिय मन्त्रीलाई निर्देशन पनि दिए ।