काठमाडौं- नेपालकै अग्रणी सिमेन्ट उत्पादक कम्पनी यस शिवम् सिमेन्ट्स लिमिटेडको तेस्रो साधारण सभा सम्पन्न भएको छ । 

पब्लिक कम्पनीमा परिणत भइसकेपछिको तेस्रो वार्षिक साधारण सभा वैशाख ९ गतेका दिन कम्पनीकाअध्यक्ष सुरेन्द्र कुमार गोयलको अध्यक्षतमा सम्पन्न भएको हो ।

कम्पनीले सर्वसाधरण शेयरधनीहरूमा शेयर निष्काशन गरेको करीब २ महिनाभित्रै सर्वसाधारण शेयरधनीले समेत प्राप्त गर्ने गरी १५ प्रतिशत (करबाहेक)का दरले हुन आउने ६९ करोड ४७ लाख ३८ हजार रुपैयाँ नगद लाभांश रकम बाँडफाँड गर्ने प्रस्ताव पारित गरेको छ । 

त्यस्तै सञ्चालक समितिको तर्फबाट अध्यक्षले प्रस्तुत गरेको आ. व. २०७४/०७५ को वार्षिक प्रगति प्रतिवेदन, लेखापरीक्षक प्रतिवेदनसहितका संलग्न विवरणहरू, आ. व. २०७५/०७६ को आयव्ययको लेखापरीक्षण गर्न लेखापरीक्षक नियुक्ति गर्ने प्रस्ताव पारित गरेको छ ।

त्यस्तै कम्पनीले समान उद्देश्य भएका अन्य कम्पनी वा संस्था प्राप्ति गर्ने,उत्पादन क्षमता अभिवृद्धि गर्ने उत्पादन विविधिकरण गर्ने र उपयुक्त अन्य कम्पनीको शेयरहरू खरीद गरी थप उद्योग स्थापना गर्ने लगायतका आवश्यक कार्यहरू अगाडि बढाउन सञ्चालक समितिलाई पूर्ण अख्तियारी प्रदान गर्ने समेतका प्रस्तावहरू पारित गर्नुका साथैै सर्वसाधारण शेयर धनी समूहको प्रतिनिधित्व गर्दै श्रीमती अलका गोयललाई सञ्चालकमा निर्विरोध निर्वाचित भएको कम्पनीले जनाएको छ ।