सुर्खेत-  उपप्रधान एवं स्वास्थ्य तथा जनसङ्ख्यामन्त्री उपेन्द्र यादवले कर्णाली सरकारलाई बलियो बनाए मात्र संघीयता सफल बताएका छन् ।

प्रदेश अस्पताल कालागाउँमा सिटी स्क्यान मेसिनको उदघाटन गर्न मंगलवार वीरेन्द्रनगर आइपुगेका उपप्रधानमन्त्री यादवले भने, 'विगतमा कर्णालीले धेरै दिएको छ । अब कर्णालीलाई दिनुपर्ने बेला आएको छ । एकोहोरो लिएर मात्रै हुँदैन ।’

उपप्रधानमन्त्री यादवले संघीयता असफल भए देशमा विध्वंश मच्चिने बाहेक केही नहुने बताउँदै प्रदेश सरकारलाई बलियो बनाएर अधिकार सम्पन्न बनाएर बढ्नुको विकल्प नरहेको उनको भनाइ छ ।

‘कर्मचारी समायोजन अत्यन्तै त्रुटिपूर्ण छ,’ प्रदेश अस्पतालमा डाक्टर अभावको प्रमुख कारण समायोजन नै भएको बताउँदै उनले भने, ‘समायोजनकै कारण हरेक तीन महिनामा मन्त्रालयका सचिवहरू फेरिने गरेका छन् । मेरै मन्त्रालयमा मैले त्यही समस्या भोग्ने गरेको छु । तरपनि कर्मचारी व्यवस्थापन जति सक्दो चाँडो गर्ने प्रयास गर्नेछु ।’ मन्त्री यादवले प्रदेश अस्पताललाई पहिले विशिष्ट अस्पताल बनाउनुपर्ने अनि मात्रै शिक्षण अस्पतालको रूपमा विकास गर्नुपर्नेमा जोड दिए ।

कर्णाली प्रदेशका मुख्यमन्त्री महेन्द्रबहादुर शाहीले संघीय सरकारले अस्पतालमा पर्याप्त जनशक्तिको व्यवस्थापन गरिदिन आग्रह गरे । ‘भवन बनाउने, सामानहरू खरीद गर्ने जस्ता काम प्रदेश सरकार गर्न सक्छ,’ उनले भने, ‘तर प्राविधिक जनशक्ति हामीसँग छैन । कर्णालीका जनशक्तिलाई कर्णालीमै पठाइदिने व्यवस्था गरिदिन मन्त्री ज्यूलाई आग्रह गर्दछु ।’ पर्याप्त जनशक्ति नभएका कारण स्वास्थ्य सेवा प्रवाहमा ठूलो चुनौती आएको मुख्यमन्त्री शाहीको भनाइ छ ।

नेपाल कम्युनिष्ट पार्टी नेकपाका कर्णाली प्रदेश सहसंयोजक तथा प्रदेश सभा सदस्य यामलाल कंडेलले राज्य सञ्चालनमा अहिले पनि कर्णालीको पहुँच नभएको बताए । उनले संरचना परिवर्तन भएपनि प्रणाली परिवर्तन नभएको बताउँदै संघीयता सफल बनाउन सबैको सोचमा प्रणाली परिवर्तन जस्तै सोचमा परिवर्तन आउनुपर्ने बताए । ‘विगतमा पटक-पटक यो वा त्यो बहानामा अनशन बस्ने प्रचलन थियो ।’ डा. गोविन्द केसीप्रति लक्षित गर्दै नेता कंडेलले भने, ‘अहिले हाम्रो अस्पतालमा डाक्टर छैनन्, अनसन बसिदिए हुन्थ्यो कसैले ।’