डेनमार्कका सबभन्दा धनी व्यक्तिका ३ छोराछोरी श्रीलंका आक्रमणमा मारिए

बैशाख १०, २०७६

काठमाडौं – श्रीलंकामा आइतवार भएको शृंखलाबद्ध बम विस्फोटमा मर्नेको संख्या ३१० पुगेको छ । घटनामा ३० भन्दा बढी विदेशी नागरिक पनि मारिएका छन् । 

डेनमार्कका सबभन्दा धनी व्यक्ति एन्डर्स पोव्सलेनका चारमध्ये तीन सन्तान पनि मारिएका छन् । पोव्सलेनका प्रवक्ताले यसको पुष्टि गरे । 


ADVERTISEMENT

एन्डर्स र उनकी पत्नीले यस विषयमा केही पनि बताएका छैनन् । एन्डर्स र उनका परिवारको निजतालाई विचार गरेर धेरै प्रश्न नसोध्न मिडियालाई अपील गरिएको छ । 

एन्डर्सका चारै सन्तान श्रीलंकामा ईस्टरको बिदा मनाउन गएका थिए । त्यहाँ घुम्दै गर्दा एन्डर्सकी छोरी एल्माले इन्स्टाग्राममा एस्ट्रिड, एग्नेस र आल्फ्रेडसँग स्विमिङ पूलमा बसेको फोटो शेयर गरेकी थिइन् । 

पावल्सन आफ्ना परिवारका सदस्यको सुरक्षाका विषयमा एकदमै चिन्तित रहन्थे । उनी आफ्ना सन्तानलाई चिनिने ठाउँमा जान दिँदैनथिए । 

पावल्सनको यो चिन्ताको कारण दुईवटा थिए । सन् १९९८ मा कर्ट हानसेन नामक एक अपराधीले उनका आमाबुवालाई निकै हैरान लगाएको थियो । उसले उनीहरूको हत्या गरिदिने धम्की दिएको थियो । पछि उसलाई प्रहरीले पक्राउ ग–यो । 

सन् २००३ मा चाहिँ पावल्सनका एक पारिवारिक मित्रलाई भारतमा अपहरण गरियो । अपहरणकारीले उनलाई पावल्सनको नातेदार ठानेर फिरौती मागेका थिए । पछि उनलाई प्रहरीले मुक्त गराएको थियो । 

अघिल्लो वर्षको फोर्ब्स पत्रिकाको धनीहरूको सूचीमा एन्डर्स २५२औं स्थानमा थिए र उनको सम्पत्ति ७.९ अर्ब डलर छ । स्कटल्यान्डको लगभग १ प्रतिशत जमीन उनकै नाममा छ । उनी र उनकी पत्नी एनको नाम स्कटिश हाइल्यान्ड्समा दुई लाख एकड जमीन छ । उनले आगामी पुस्ताका लागि यति धेरै जमीन किनेका थिए । 

यसैगरी आक्रमणमा परी एक बेलायती नागरिक बेन निकोल्सनकी पत्नी अनिता, छोरा एलेक्स र छोरीको पनि मृत्यु भएको छ । अनिता शांग्रिला होटलमा बसेकी थिइन् । त्यहाँ दिउँसोको खाजा खान उनले दुई सन्तानलाई पनि लगेकी थिइन् । 

बिहान पौने ९ बजे उनीअगाडि उभिएको मानिसले आत्मघाती बम विस्फोट गरिदिए । तीव्र विस्फोटपछि बेनले घटनास्थलमा पत्नी र छोरीको क्षतविक्षत लाश भेटे । छोराको लाश उनले पोस्टमोर्टम हाउसमा मात्र चिन्न सके ।

एजेन्सी
 

बैशाख १०, २०७६ मा प्रकाशित

प्रतिक्रिया दिनुहोस