सुर्खेत- दैलेखको आठबीस नगरपालिकामा नेपाली कांग्रेसले विवाद सिर्जना गरेको छ । तीन महिनाअघि आफू अनुकूलको निर्णय नभएको आरोपमा उपप्रमुख दीपा बोहोरा नेतृत्वको टोलीले प्रमुख प्रशासकीय अधिकृतबाट माइन्युट कब्जा गरेका थिए । उक्त मुद्दाको छिनोफानो दैलेख सदरमुकाममा नै लागेको थियो ।

प्रमुख जिल्ला अधिकारी, नेपाली कांग्रेसका जिल्ला सचिव, सरकारी वकिल र नेकपाका प्रतिनिधिबीच त्यतिबेला आगामी दिनमा त्यस्तो नगर्ने सहमति भएको थियो तर उक्त सहमति काँग्रेसले तीन महिनामा नै दोहोर्‍याएको छ ।

नगरपालिकाले वैशाख २६ गते बैठक बोलाएको थियो । उक्त बैठकमा केही निर्णय पनि भएका थिए । नगरमा अल्पमतमा रहेको कांग्रेसले गत वैशाख २७ गते बिहान प्रमुख प्रशासकीय अधिकृत कुलप्रसाद सुवेदीसँग उपप्रमुख बोहोराले माइन्युट मागेकी थिइन्  ।

उनलाई सहजै दिएका अधिकृत सुवेदीले वडा नं. ८ का वडा अध्यक्ष मुक्ति प्रसाद उपाध्यायले माइन्युट च्यातेका थिए । माइन्युट खोसेर गरिएका माइन्युटमा गरिएका चार वटा निर्णयहरू च्यातेपछि विवाद सतहमा आएको हो ।

माइन्युट च्यातिएपछि नगर प्रमुख र वडाअध्यक्षले इलाका प्रहरी कार्यालय राकममा घटना विवरण मुचुल्का समेत गरेका छन् । सोही मुद्दा अहिले दुवै पक्ष जिल्ला सदरमुकाममा प्रमुख जिल्ला अधिकारी, अन्य वकिलहरू, आफ्ना दलका नेताहरूसँग छलफलसमेत भएको छ ।

यता नगरप्रमुख खड्गराज उपाध्यायले बारम्बार कांग्रेसबाट निर्वाचित पदाधिकारीले माइनयुटलाई नै निशाना बनाउनुको कारणबारे आफूलाई जानकारी नभएको बताए । ‘वैशाख २६ गते हामीले विभिन्न चार वटा निर्णय गरेर कोठामा गइसकेका थियौं,’ उनले भने, ‘बिहान आठ बजे नेपाली काँग्रेसको दलबलसहित आएर उहाँहरूले माइन्युट च्यात्नुभएछ । बारम्बार नगरमा यस्तो घटना हुँदा दुःख लागिरहेको छ ।’ नगरपालिकामा कामै गर्न नदिइने उनीहरूको योजनाअनुसार यस्ता हर्कत गरिएको उनको भनाइ छ ।

‘हामीले हरेक वडाको पार्श्व चित्र बनाउने निर्णय गरेका थियौं । सोही निर्णयमा उहाँहरूको आपत्ति थियो,’ उनले भने, ‘ती लगायत अन्य विभिन्न वडाका आयोजनाहरू संघ र प्रदेशसँग माग्ने निर्णय गरेका थियौं ।’ उपप्रमुख दीपा बोहोरा, वडा नं. ६ का अध्यक्ष धीरबहादुर शाही, वडा नं. ८ का अध्यक्ष मुक्ति उपाध्याय, वडा नं. ७ का चक्रबहादुर शाही, वडा नं. २ का अध्यक्ष पुर्णप्रसाद खनाल, मेयर पदमा निर्वाचनमा हारेका प्रेमप्रकाश शाही, वडा नं. ७ का खगेन्द्रबहादुर शाही, वडा नं. ४ का भक्तबहादुर माझी लगायतको टोलीले उक्त कार्य गरेको नगर प्रमुख उपाध्यायको भनाइ छ ।

मुद्दा गर्ने तयारी

आठबीस नगरपालिकाका नगरप्रमुख उपाध्यायले कांग्रेसको यो हर्कतविरुद्ध अदालतमा मुद्दा गर्ने तयारी गरेका छन् । ‘हामीले हाम्रा साक्षीहरू सहितको इलाका प्रहरी कार्यालयबाट मुचुल्का उठाएर ल्याइसकेका छौं,' उनले भने, ‘छलफलबाट कुनै निष्कर्ष ननिस्किए अदालतमा मुद्दा दर्ता गर्नेछौं । दलको नाउँमा आठबीस नगरपालिकालाई काम गर्न दिनबाट वञ्चित गराउन कसैले पनि पाउँदैन ।’ उनले लोकतन्त्रको मसिहा ठान्ने काँग्रेसले गैर जिम्मेवार हर्कत नगरमा दोहोर्याई रहेको गम्भीर आरोप समेत लगाए ।

यता छलफलका लागि जिल्ला सदरमुकाममा आएकी उपप्रमुख दीपा बोहोराले वडाहरुको संख्या थप गर्ने प्रस्ताव आएका कारण आफूहरूले पार्टीसँग सल्लाह गर्ने भनेका कारण विवाद भएको बताइन् । यसबाहेक अन्य विषयमा थप जानकारी लिन वडाअध्यक्ष मुक्ति उपाध्यायलाई सोध्न भनिन् । वडाअध्यक्ष उपाध्यायले भने आफू अहिले बैठकमा भएको बताए ।

घटनाको विषयमा बुझ्न वडाध्यक्ष उपाध्यायले आफू मिटिङमा भएको बताए । 

यता जिल्ला प्रशासन कार्यालय दैलेखका प्रमुख जिल्ला अधिकारी लक्ष्मी प्रसाद बास्तोलाले नगरपालिकाको विवाद मिलाउने प्रयास भइरहेको प्रतिक्रिया दिए । ‘हामीले उहाँहरूलाई निर्देशन दिन मिल्दैन । सहजीकरण मात्र गर्ने हो,’ उनले भने, ‘यदि सहमति भएन भने अदालतले मुद्दा टुंगो लगाऔंला ।’ 
हेर्नुहोस तस्विरमा प्रहरी मुचुल्का ।