बुटवल – ५ नम्बर प्रदेशका मुख्यमन्त्री शंकर पोखरेलले सहकारीले जनताको जीवनस्तर सुधारका लागि काम गर्न नसकेको बताएका छन् ।

उनले सहकारी र बैंकमा खासै अन्तर नदेखिएको बताए । भूमि व्यवस्था कृषि तथा सहकारी मन्त्रालयले आयोजना गरेको ‘समृद्ध प्रदेश निर्माणका लागि व्यावसायिक सहकारिता’ विषय गोष्ठीलाई शुक्रवार बुटवलमा सम्बोधन गर्दै मुख्यमन्त्री पोखरेलले सहकारी समुदायमा आधारित र स्थानीयकृत हुनुपर्ने भएपनि त्यो काम सहकारीले गर्न नसकेको गुनासो गरे ।

‘सहकारीहरूको काम भनेको स्थानीय क्षेत्रको आर्थिक स्थिति उकास्ने हो,’ पोखरेलले भने, ‘बचत तथा ऋणको नाममा सहकारीहरूले मिनि बैंकजस्तै चर्को व्याज असुल्ने, व्यापारीकरण गर्ने कार्यमा गरेका छन् । यसले ३ खम्बे अर्थ नीति नारामै सीमित हुने देखिन्छ ।’

उनले जनताको जीवनस्थिर माथि उठाउने कार्यमा  सरकारले कार्य निरन्तर गरेको भन्दै यसमा सबैको साथ र सहयोग आवश्यक रहेको बताए ।  

कार्यक्रममा केन्द्रीय सहकारी महासंघका अध्यक्ष तथा पूर्वमन्त्री केशव बडालले सहकारीहरूले नेपालमा गरेको कार्य उत्कृष्ठ रहेको बताए । उनले सबैको साथ र सहयोग प्राप्त भएमा अझै धेरै कार्य गर्न सक्ने धारणा राखे ।

५ नम्बर प्रदेश भूमि व्यवस्था, कृषि तथा सहकारीमन्त्री आरती पौडेलले प्रदेश सरकारले केही नमूना कार्यको शुरूवात गरेको बताइन् । कार्यक्रममा सहकारी विज्ञ डा. खगराज शर्मा, राष्ट्रिय सहकारी संघका अध्यक्ष केशव बडाल, सहकारी तथा गरीबी मन्त्रालयका सचिव गोपीनाथ मैनालीले कार्यपत्र प्रस्तुत गरेका थिए ।